Алматы эпидемиологиялық бағалау матрицасы бойынша әлі қызыл аймақта.
«22 қыркүйекте қалада коронавирус инфекциясының 164 289 жағдайы тіркелді, оның ішінде 141 872 науқас симптомды және 22 417 – симптомсыз, анықталмаған пневмония – 2346. 21 қыркүйете коронавирус инфекциясының 498 жағдайы тіркелді, оның ішінде 470-і симптомды, 28-і симптомсыз, анықталмаған пневмония – 5», деді қала әкімі.
Бақытжан Сағынтаев қалада коронавирусқа шалдыққан науқастарға арналған төсек орындар мен науқастардың бүгінгі нақты санын да айтты.
«Инфекциялық стационарларда 5230 төсек орын бар, оларда 2337 адам емделуде, оның ішінде 111 бала. 100 науқас ауруханаға өте ауыр жағдайда түсті, 993-інің жағдайы ауыр, 1241-і орташа ауырлықта, 3-інің жағдайы жеңіл. Реанимация және интенсивті терапия бөлімінде 229 науқас жатыр. ӨЖЖ аппаратында – 43, инвазивті емес ӨЖЖ – 103, High flow аппаратындағылар – 68», деді Сағынтаев.
Шаһар басшысы әлі де санитарлық-эпидемиологиялық қауіпсіздік шараларын сақтау керектігін және індетке қарсы жаппай вакциналану – инфекцияның жаңа толқынының алдын алуға көмектесетінін айтты.
«Екпе салдыру еліміздің кейбір аймақтарында тіркелген жаңа Eta штамына да тосқауыл болады», деді Б.Сағынтаев.
Өткен тәуліктерде бірінші компонентпен 2417 адам, екінші компонентпен 3906 адам вакцинацияланды. 1 ақпаннан 21 қыркүйекке дейінгі аралықта 933 678 адам I компонентпен, 827 239 ІІ компонентпен егілді.
