Инфекциялық бөлімдер жабылып жатыр

– Қазіргі кезде аурухана­лар­да 968 науқас емделуде. Жансақтау бөлімдерінде 88 нау­қас жатыр. Жалпы, ин­фек­ция­лық емхананың 45 пайызында науқастар бар. Соңғы кезде инфекциялық орын­дар­ға науқастардың түсу­інің азаюына байланысты қо­сым­ша ашыл­ған орындар қыс­қар­ты­л­уда. Қазір барлық аудан­дық ауруханалардағы, облыс ор­талығындағы инфек­ция­­­лық бөлімдер де жабылды, – деді онлайн брифингте об­лыс­тық денсаулық сақтау бас­қар­масының басшысы Айдар Сейітқазинов.

Жалпы, емханаға түскен нау­қас­тарға қажетті оттегі құрыл­ғы­лары жеткілікті, медициналық пер­соналдың қажетті мөлшері бар. Емханалардың жанында 166 мобильді бригада, ПТР диагностикасын жүргізуге ар­налған 7 зертхана жұмыс іс­теу­де. Тәулігіне орта есеппен 2 300 ПТР қорытындысы шы­ға­рылады.

Ал Ақсу қалалық ауруха­на­сының бас дәрігері Мақсат Мұқашевтың айтуынша, 3 117 адам індет жұқтырған болса, қазір 161 адам бақылауда, ауруха­на­да 86 адам емделуде. Қала тұрғындарының 64 пайызы вакцина қабылдаған. Сонымен бірге, Ақсу ферроқорытпа зауыты мен Еуразиялық энергетикалық корпорацияның энергетиктері мен жұмысшылары екпе қа­был­дады. Зауыттарда екпе алу орындары ашылған. Мысалы, Тереңкөл ауданының тұрғыны, 93 жастағы Ерғалым Қапкенов «Спутник V» екпесін алған.

– Үйде немерелерім бар. Олардың денсаулығы мен үшін маңызды. Індеттен өзімді және туғандарымды қорғау үшін екпе алдым. Тұрғындарды да ек­пе алуға шақырамын, – дейді Ерғалым ата.

Облыстағы Май ауданының тұрғындары ұжымдық имму­нитет­ті қалыптастыруда үлгі бо­луда. Бүгінде аудан жұртшы­лы­ғының 70 пайыздан астамы қауіпті індетке қарсы екпе алған. Аудандық ішкі саясат бөлімінің мәліметінше, екпе салу кабинеттері үзіліссіз әрі де­малыссыз жұмыс істейді. Ауданда денсаулығы екпе алуға жарамды 6 007 адамның 4 632-сі егілген. Егу бөлімшелері аудан­­дық аурухана мен Қазан, Ма­лай­сары, Қаратерек ауыл­дық аумақтарында ашылған. А­қ­шиман, Майтүбек, Қара­те­рек, Ақжар, Малайсары, Саты ауылының тұрғындары бел­сен­ділік танытып, екпе алуда. Демалыс күндері жылжымалы екпе егу кешені және меди­ци­на­лық қызметкерлердің көш­пе­лі бригадалары жұмыс істейді.

Ал Успен ауданында 700-ден астам тұрғын екпе алып болған соң аудан ішінде ұжымдық иммунитет қалыптасқан. Өйткені өңір бойынша иммундауға жататын 7 079 адамның 6 365-і ­екпе алып үлгерген. Успен ауданының 11 ауылында екпе алуға қарсы көрсетілімдері жоқ тұрғындардың бәрі екпе алған. Аудан әкімі Николай Дычконың мәліметінше, аудан аумағында жауапты адамдар белгіленген. Еріктілер ауыл тұрғындарына қоңырау шалып, жергілікті қоғамдастық өкілдері жерлестеріне вакцина алу қажеттілігі туралы айтып береді. Ауыл әкімдерінің WhatsApp желісі арқылы хабарлама таратуы жолға қойылған.

Облыс емханаларына ін­дет­ке қарсы екпенің І ком­по­нен­ті бойынша 362 785 және II ком­поненті бойынша 323 765 данасы жеткізілген. Об­лыс­тық ден­сау­лық сақтау бас­қар­ма­сы­ның мәліметінше, күз мез­гілінде өңір тұрғындарының кем дегенде 60 пайызы екпе алып, ұжымдық иммунитетті қалыптастыруы керек. Бірақ шілде мен тамыз ай­ларымен салыстырғанда қа­­зір вакцина алушылардың  саны азай­ған. Облыста ал­ғаш­қы екпе қабылдауды 281 мың­нан астам адам алса, екінші ком­по­нент­ті 250 мыңнан астам адам қа­был­даған көрінеді. Өңір бо­йынша 450 мың адам алады деп жоспарланған болса, бүгінде вакцинаның І компонентін 64 пайызы, ІІ компонентін 55 па­йызы қабылдапты. Қазіргі таңда облыс тұрғындарына екпенің Спутник V, Qazvac, Vero Cell түрлері салынуда.

Павлодар облысы