Бірыңғай ақпараттық жүйе лицензиясынан айырылған банктер салымшылары тізілімдерін біріктіреді. Бұл салымшыға лицензиясынан айырылған (таратылып жатқан) барлық банктегі депозиттер бойынша төленуге жататын кепілдік берілген өтем сомаларын тексеруге және осы бойынша бір өтінішпен өтем алуға жол ашады. Сонымен қатар салымшы жүйедегі жеке кабинет арқылы өтінішінің орындалу мәртебесін өз бетімен қадағалау мүмкіндігіне ие болады.
Кепілдік берілген өтемді төлемдердің электронды порталы арқылы алуға шоттардың, карточкалар мен депозиттердің иелері ғана өтініш бере алады. Өтініш электронды цифрлы қолтаңбаның көмегімен беріледі. Одан әрі бейне және SMS-код арқылы қос факторлы биометриялық сәйкестендіруден өту қажет. Бұл ретте SMS-кодты алу үшін салымшылардың ұялы телефондары мобильді азаматтар базасында тіркелген болуы керек. Толық нұсқаулық порталда қолжетімді.
Салымшылардан онлайн өтініштер қабылдау кезең-кезеңмен жүзеге асырылады. Қазіргі уақытта жаңа сервисті «Қазинвестбанк» АҚ, «Эксимбанк Қазақстан» АҚ салымшылары пайдалана алады.
«Қазинвестбанк» АҚ және «Эксимбанк Қазақстан» АҚ салымшыларының сенімхат бойынша өкілдері, мұрагерлері және өзге де құқық иеленушілері өтем алу үшін жазбаша өтінішті ҚДКБҚ-ға тапсырады.
Барлық банк операцияларын жүргізу лицензиясынан айырылған: «Delta Bank» АҚ, «Qazaq Banki» АҚ, «Tengri Bank» АҚ, «AsiaCredit Bank (АзияКредит Банк)» АҚ, «Capital Bank Kazakhstan» АҚ және «Астана Банкі» АҚ салымшылары үшін өтінішті төлемдердің электронды порталы арқылы беру мүмкіндігі алдағы уақытта қолжетімді болады.
«Валют-Транзит Банк» АҚ салымшылары кепілдік берілген өтемді алу үшін Қорға немесе банктің тарату комиссиясына мына мекенжай бойынша жүгіне алады: Қарағанды қ., Бұқар жырау даңғылы, 51/4, телефон:
8 (721) 299-64-05 (12).
Салымшылар төлемдердің электронды порталының жұмысы бойынша өздерінің ескертулері мен ұсыныстарын kdif@kdif.kz электронды поштасына жібере алады. Қор осылайша белсенділік танытқан салымшыларға ризашылығын білдіреді.
