Күн тәртібінде – Елбасы Жолдауын түсіндіру мен насихаттау

Мәжіліс депутаттары ақпан айының 6-сы мен 15-і аралығында еліміз аймақтарында болып, Елбасының «Қазақстан жолы-2050: бір мақсат, бір мүдде, бір болашақ» Жолдауын түсіндіру, насихаттау жұмысына кіріспек. Бұл туралы «Нұр Отан» партиясы фракциясының жиналысында Мәжіліс Төрағасы, фракция жетекшісі Нұрлан Нығматулин мәлім етті. Жиын барысында нұротандық-мәжілісмендер алдағы жұмыс жос­парын қарап, бекітті. Халық қалаулылары еңбек ұжымдарымен, шағын және орта бизнес өкілдерімен кездесіп, әлеуметтік нысандарды аралайды. Депутаттар ұзақмерзімді «Қазақстан-2050» Стратегиясын негізге ала отырып, еліміз дамуының басым бағыттарын белгілеген Жолдаудың мақсаттары мен міндеттері жайында кеңінен әңгімелейді. Бұл ретте аталған стратегиялық құжатты құқықтық қамтамасыз ету бойынша заң шығармашылық жұмысына баса назар аударылмақ. Сондай-ақ, осы уақытқа дейін қа­был­данған және қазіргі уақытта қарауға алынған заңнамалық акті­лер­ге де баса назар аударылады. Нұрлан Нығматулиннің атап өткеніндей, Президентіміз елі­міз алдында үлкен мүм­кіндіктерге жол ашып отыр. Оны жүзеге асыруға әрбір қазақстандық белсене араласуға тиіс. Мәжіліс спикері насихат жұмысы барысында облыс, аудан орталықтарымен қатар, шал­ғай­дағы елді мекендерді де қамту маңызды екенін қадап айтты, деп хабарлады осы палатаның баспасөз қызметі.