Елбасы Н.Ә.Назарбаевтың «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауы қазіргі уақытта қоғамда қызу талқылану үстінде. «Қазақстан-2050» Стратегиясын жүзеге асыру жолдарын жіліктеп берген Жолдау тың идеялар мен соны бағыттарды айқындап бергені анық. Соның ішінде, мен үшін оның басты жаңалығы – сан жылдардан бері ұлт идеологиясын темірқазық етіп беруі болды. Ол – Мәңгілік Елге айналу идеясын басты мұраты еткен «Мәңгілік Қазақстан» жобасында жатыр.
Қазақстан халқына арналған Жолдау ұлттық идеология мен кемелденген ел болу жолында атқарар игі бастамаларға толы. Мемлекет басшысының әрбір Жолдауы бір-бірімен астасып, байланысып жататыны белгілі. «Қазақстан-2030» Стратегиялық даму бағдарламасын ұсынған уақыттан бері Қазақстан әлемдік деңгейге өзіндік ұстанымы мен пікірі бар мемлекет ретінде танылып, Елбасы ұсынған даму белестерін батыл қадамдар жасай отырып бағындыра білді. Ал биылғы Жолдаудың басты ерекшелігі – оның мазмұнында қамтылған тың идеялар мен инновациялық ұсыныстардың басын біріктіретін, бір мақсат пен бір мүддеге тоғыстыратын «Мәңгілік Қазақстан» жобасының ұсынылуы деп білемін. Бұл жоба – «Мәңгілік Ел» атты идея арқылы елді ымыраға ұйыстыратын, ірі мақсатқа жету жолында жұдырықтай жұмылдыратын ұлттық идеологияға негіз болары сөзсіз.
«Мәңгілік Қазақстан» жобасының астары тым әріде жатыр.Есімізде болса, Елбасы Н.Ә.Назарбаев «Қазақстан – 2050» Стратегиялық даму бағдарламасын алғаш жария еткен тұста «Бұл дүниеде біздің бір ғана Отанымыз бар, ол – Тәуелсіз Қазақстан.Біз болашаққа көз тігіп, тәуелсіз елімізді «Мәңгілік Ел» етуді мұрат қылдық» деген болатын. Сондай-ақ, жуырда өткен Тәуелсіздік күні мерекесіне орай сөйлеген құттықтау сөзінде де «Басты игілігіміз – біздің қасиетті де лайықты еліміз – Мәңгілік Ел. Он төрт мың шақырымнан астам талас тудырмайтын шекарамыз біздің Отанымызды біртұтас монолитке шегендеді», – деп ендігі мақсатымыз сол Мәңгілік Елдігімізді құндақтап, ХХІ ғасырдың биік белесіне шығару екендігін жеткізген. Іле-шала бір айдан кейін «Басты мақсат – Қазақстанның ең дамыған 30 мемлекеттің қатарына қосылуы. Ол – «Мәңгілік Қазақстан» жобасы, ел тарихындағы біз аяқ басатын жаңа дәуірдің кемел келбеті» деген Елбасы биылғы Жолдауын да осы кемеңгер ойдан бастады. Мұндай сәйкестік тегіннен-тегін емес. Өйткені, бұл дегеніміз тарихи тамыры тереңде жатқан, алысты көрегендікпен еңсерудің ұлық ойлау жүйесі.
«Мәңгілік Қазақстан» жобасы – Қазақ халқының мәңгілік ел болу жолында сан ғасырлар бойы абыз ақсақалдардың ақ батасымен, ақ жаулықты ананың ақ сүтімен, аппақ жүректі періште сәбидің ақ тілеуімен жүріп келе жатқан жолының шығар биігі, алар асуы. Білге, Тоныкөк, Күлтегін жырларында айтылған Түркі халқының жойылмай ел болуы жайындағы армандар, міне, бүгінгі күнгі жаңа ғасырдың, жаңа заман ұрпағының алдында өз жалғасын тауып отыр. Бүгінгі Қазақстан егемендікке қол жеткізгеннің ертеңіне-ақ дүниежүзі елдерінің алдында Алтай мен Атыраудың арасын ен жайлаған Қазақ елінің бекер ел еместігін таныту жолындағы еңбек жалғасып келеді.
Салиқалы саясаткердің сарабдал ұстанымының арқасында аз ғана уақыттың ішінде Орталық Азия елдерінің арасында бой түзеген, әлемнің алпауыт мемлекеттерінің қатарына арындап кіруге ұмтылған елге айнала білдік. Дүние жүзінде тәуелсіз мемлекеттердің ел болып қалыптасу уақыты мен көші түзелген мерзімі Қазақстанмен салыстырғанда әлдеқайда ұзағырақ. Қалай болған күннің өзінде де 22 жылдың ішінде Елбасы айтқан «нөлдік» деңгейден дүние жүзі бойынша дамыған 50 елдің қатарынан Қазақстанның нық көрінуі – таңғаларлықтай ғажап құбылыс.
Ендігі белес – 2050 жылға дейін Қазақстанды дамыған 30 мемлекеттің қатарынан Мәңгілік Ел ретінде таныту. Тәуелсіздігіміздің 20 жылдығына орай елордасы Астана қаласында «Мәңгілік Ел» салтанатты қақпасы ашылды. Тұңғыш Президенттің бастамасымен бой көтерген қақпа – жаңа белестің, жаңа дүниенің есігі, өткен мен келешекті байланыстырушы дәнекер. Міне, сол Мәңгілік Елдің қақпасы салынып, бүгінгі күні 2050 жылға дейін әлем мемлекеттері санасатын, үні басым, болмысы айқын, дамыған мемлекетке айналу – аса биік мәртебелі меже.Демек, Елбасы айтпақшы, «Қазақстан-2050» Стратегиялық бағдарламасында «Бабалардың ерлігі, бүгінгі буынның ерен істері және жас ұрпақтың жасампаздығы арасында сабақтастық болса ғана, біз «Мәңгілік Ел» боламыз».
Ал «Мәңгілік Қазақстанның» әлемге естілер үні мен айтылар сөзі қазақ тілінде естілетіні қуантады. Биылғы Жолдауда «Қазақстанның мемлекеттік тілінен гөрі, ресми тілінің қолданыс аясы кеңейіп барады» деген шолақ ойлы пікірдің тамырына балта шабылды. Қазақ тілі ғылымның, білімнің, техниканың, интернеттің тіліне айналғанын дүйім жұртқа жеткізуі анық шындықты көпшіліктің есіне тағы бір мәрте түсірді. «Енді ешкім өзгерте алмайтын бір ақиқат бар. Ана тіліміз Мәңгілік Елімізбен бірге Мәңгілік тіл болды! Оны даудың тақырыбы емес, ұлттың ұйытқысы ете білгеніміз жөн» деді Мемлекет басшысы. Қазақстан жерінде бейбіт шаңырақтың астында өмір сүріп жатқан көптеген ұлттарды ұйыстырушы бірден-бір фактор – қазақ тілі. Мемлекеттік тілді оқытып-үйрету жұмыстарының нәтижелі атқарылып отырғандығынан болашақта қазақ тілінде білім алушылардың саны артып, қазақ тілді мамандар бағаланады деп айтар едім. Үш тұғырлы тіл саясатын ұстануда қазақ тілі орыс және ағылшын тілдерінің көлеңкесінде қалып қояды деген күдік пен күмәннің сейіліп, бұл күнде ақпарат қазақ тілінде таралып, әлем және қазақ әдебиеттері топтастырылған қазақ тілді сайттар мен порталдардың жұмыс істеуі, қазақ тілді оқу-құралдарының, әсіресе, балалар әдебиетінің көркемдік сапасының артуы, қоғамдық орындарда, халыққа қызмет көрсететін мекемелердің жұмыс барысының қазақ тілінде жүргізілуі мемлекеттік тілдің деңгейінің өсіп, қолданыс аясының кеңейгендігін бек байқатады.
Сонымен қатар, республиканың әр аймағында үздік оқушылардың қабілет-қарымын дамытуға мол мүмкіндік беретін Назарбаев зияткерлік мектептері ашылып, жұмыс істеп жатқандығы қуанышты жағдай. Елбасының биылғы Жолдауында «Орта білім жүйесінде жалпы білім беретін мектептерді Назарбаев зияткерлік мектептеріндегі оқыту деңгейіне жеткізу керек. Мектеп түлектері қазақ, орыс және ағылшын тілдерін білуге тиіс. Оларды оқыту нәтижесі оқушылардың сындарлы ойлау, өзіндік ізденіс пен ақпаратты терең талдау машығын игеру болуға тиіс» деп қадап айтқан сөзі білім беру саласының мамандарының алдына қойылған үлкен тапсырма. Қазақ не орыс тілді мектепті бітірген оқушы бір ғана тілді емес, үш тілді меңгеретіндей сапалы біліммен қамтамасыз етілуі – педагог мамандарды даярлайтын оқу орындарының жұмысына берілген жүктеме деп айтар едім. Себебі, кәсіби деңгейі жоғары маман ғана заман ағымына қарай бейімделіп, жаңа технологияларды жетік меңгеріп, сабақ берудің әдіс-тәсілдерін жетілдіре отырып оқушының қызығушылығын оята білетіндігі сөзсіз. Осы тұрғыдан алғанда республикадағы педагогикалық көшбасшы оқу орнының қатарында тұрған Қыздар университеті Жолдауда көрсетілген білім берудің ұлттық жүйесін қалыптастырып, дамыту үшін бар күш-жігерін аямайды.
2050 жылға дейінгі дамудағы Қазақстанның жолы кезең-кезеңімен жүзеге аспақ. Шикізат көзі ғана болып танылып отырған Қазақстан дайын өнім өндіретін мемлекетке айналады. Жолдауда айтылған мобильдік, мультимедиялық, нано және ғарыштық технологиялар сынды адамзатқа қажетті озық үлгілерді Қазақстанда жасап шығару үшін ғылым саласын дамыту керектігі сөз болды. Ғылыми ізденістерге құштарлықты ояту мектеп қабырғасынан басталып, жоғары оқу орындарында жалғасын таппақ. Осы тұрғыда республикамыздағы әрбір жоғары білім беретін оқу орындары өз базасында ғылымды дамытуға үлес қосса, ғылыми жаңалықтар мен ізденістерге дер кезінде көңіл бөлсе, оның адамзат игілігіне пайдасы тиюіне қолдау білдірер болса, сөзсіз Қазақстан ғылымы қарыштап алға кетеді. Яғни, жұрт болып жұмылып кіріскенде ғана шын нәтижеге қол жеткізе аламыз. Сондықтан да зерек оқушыны жоғалтып алмай, сапалы білім беріп, нағыз ғалым, жаңашыл, жаңғырған тұлға етіп дайындау ұстаздардың мойнына артылар ауыр жүк. Бақырдың ішінен алтын мен алмасты тани білмесек, біз үшін сыр сандықтың кілтін табу қиынның қиыны болып қала берері сөзсіз.
«Қазақстан-2050» Стратегиясы – барлық саланы қамтитын және үздіксіз өсуді қамтамасыз ететін жаңғыру жолы. Биылғы Жолдау «Қазақстан-2050» Стратегиялық жоспарының орындалу бағытын айқындаған, толықтырған, жіті түсіндірген арнау болғаны ақиқат. Себебі, Стратегия жарияланғалы бері бір жыл бойы біз оны зерттеумен, екшеумен жүрдік. Енді Елбасының өзі бас болып, оны қалай орындау қажеттігін айқындап берді. Тек біз, көрсетілген айқын бағыттан айнымауымыз керек.
Барлық саланы қамтыған маңызды құжат білім беру саласындағы тағы бір түйткілдің түйінін тарқатты. Педагог еңбекақысы мен студент шәкіртақысының өсетіндігін жеткізген Жолдау, сондай-ақ, талапкердің мамандық таңдауда ұстаздық жолға шынайы өз қалауымен келуін талпындыра түспек. Себебі, ел экономикасы тұрақтанбаған, халықтың әл-ауқаты нашар кезде ұстаздық жолға білім деңгейі төмен, сәнге айналған мамандыққа іліге алмаған шәкірттер келеді деген жаңсақ пікір қалыптасқаны белгілі. Елбасы Н.Ә.Назарбаевтың жаңа Жолдауы осы пікірді одан сайын сейілтіп, ұстаз мәртебесінің артуына зор мүмкіндік беріп отыр. Келешекте 2050 жылға дейін даму жоспары бойынша сапалы біліммен қамтамасыз ететін заманауи дамыған оқу орындары мен бәсекеге қабілетті кәсіби деңгейі жоғары оқытушылар, өз мамандығының иелері әрбір шаңырақ баласына сауатын тағылыммен оқытып, келешегіне кең жол ашатын болады. Осы тарапта әрі мықты педагог, әрі тәрбиелі ана шаңырақ шырақшыларының мерейі үстем бола бермек.
Әрбір салаға жіті тоқталып, 10 ілкімді идеяға жіктеген Елбасының басты мақсаты – ата-баба арманындағы «Мәңгілік Қазақстан» жобасын жүзеге асыру. Түркі қағандарының, Қазақ хандарының қалауы, Абайдың арманы, Алаш қайраткерлерінің діттеген мақсаты ХХ ғасырдың аяғында Қазақ елінің басына қонған бақ – Тәуелсіздікпен орындалды. Әрбір азаматтың қолда бар ең асыл қазынасы, байлығы осы дербестік екендігін Елбасы әрбір сөзінде қадап айтып келеді. Осы Тәуелсіздікті уысымыздан шығарып алмай, басымызға тәж, астымызға тақ ете білуіміз үшін «Қазақстан-2050» Стратегиясында көрсетілген бағыттар бойынша жүрер жолымыздың айқын бағдарын жасап алғанымыз тиімді. «Төртеу түгел болса, төбедегі келеді» немесе төрдегі иіледі. Сондықтан, ұлтты ынтымаққа ұйыстыратын, бір шаңырақтың астында бейбіт өмірін жалғастыруға мол мүмкіндік беретін – «Мәңгілік Ел» идеясы ұлттық мұрат болып, «Мәңгілік Қазақстан» жобасы ұлттық идеологиямыздың негізіне айналуына қазірден бастап күш салуымыз керек. Бұл арманға толы аңызды ақиқатқа айналдырудың нақты тетігі болмақ.
Динар НӨКЕТАЕВА,
Қазақ мемлекеттік қыздар педагогикалық
университетінің ректоры.
АЛМАТЫ.