Аймақтар • 29 Қыркүйек, 2021

Маңғыстау облысындағы бірнеше басшыға сөгіс жарияланды

Маңғыстау облысы әкімінің бірінші орынбасары мен аудан басшыларына «Nur Otan» жол картасын орындамағаны үшін сөгіс жарияланды, деп жазады Egemen.kz.

Әсел САРҚЫТ

Маңғыстау облысының әкімі, «Nur Otan» партиясы Маңғыстау облыстық филиалы Саяси кеңесінің мүшесі Нұрлан Ноғаевтың төрағалығымен партияның облыстық филиалында Саяси Кеңес Бюросының отырысы өтті.

Күн тәртібінде «Nur Otan» партиясының «Маңғыстау облысының 2021-2025 жылдарға арналған «Өзгерістер жолы: әр азаматқа лайықты өмір!» сайлауалды бағдарламасын іске асыру жөніндегі жоспары қаралды. Жоспарға әлеуметтік нысандар құрылысы, жол инфрақұрылымы, халықты жұмыспен қамту, шағын және орта бизнесті дамыту және т.б., барлығы 112 шара енгізілген.

Саяси Кеңес Бюро отырысында бекітілген жол картасының Маңғыстау облысы бойынша сайлауалды міндеттемелерін орындау аясында «Nur Otan» партиясының облыстық, қалалық, аудандық сайлауалды бағдарламаларына жүйелі мониторинг ұйымдастырған. Облыста және аудандар мен қалаларда арнайы штаб жұмыс істейді.

Жыл басынан бері жүргізілген талдау нәтижесінде барлығы 112 іс-шараның 41-і орындалды, 6-ы орындалу сатысында, алтауының орындалмау қаупі бар, 4-і ауыстыруды қажет етеді.

«Бұл жұмыстарға мемлекеттік орган басшылары жауапты. Халық бізден жол картасын сапалы жүзеге асыруды күтеді, сондықтан біз өзімізге артылған сенімді ақтауға міндеттіміз. Жоспардың орындалмауы әкімдер мен басқарма басшылары арасында ішкі байланыстың жоқтығын көрсетіп тұр. Бұл іске деген жүйелі жұмыстың жоқтығы. Бәріміз бір бағытта жұмыс істеуіміз керек. Сонда ғана алдымызға қойылған міндеттерді орындап, өз мүмкіндіктерімізді тиімді пайдаланатын боламыз», деді Нұрлан Ноғаев.

Отырыс соңында Маңғыстау облысы әкімінің бірінші орынбасарына, Қарақия және Бейнеу аудандарының әкімдеріне «Nur Otan» партиясының жол картасын дұрыс бақыламағаны және тиісінше орындамағаны үшін сөгіс түрінде партиялық жаза берілді.

Нұрлан Ноғаев жауапты тұлғаларға жүктелген міндеттерді мерзімінде орындауды тапсырды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз