Жезқазғанда Жанат Хаджиев атындағы форум-фестиваль өтті

Тәуелсіздіктің 30 жылдық мерей­то­йына және Қазақ КСР халық әр­тісі, Социалистік Еңбек Ері Серәлі Қожам­құловтың 125 жылдығына арналған фес­тиваль карантин шектеулеріне байланысты өзінің форматын өзгертіп, форум түрінде өтті. Соған сәйкес қатысуға ниет білдірген өнер ұжымдарының саны да шектеулі болды.

Жезқазған театры тарихындағы 50-ші маусымның басталуына дөп келген форум-фестивальдың ашылу сал­та­натында Қарағанды облыстық мәде­ниет, мұрағаттар және құжаттама басқар­ма­сының басшысы Еркебұлан Жұмакенов облыс бас­шысының құттықтау хатын оқып берді.

Ал Жезқазған қаласының әкімі Қай­рат Әбсаттаров фестивальдың еліміздегі ұлт­тық театрлардың өнерін насихат­­тау, Қазақстан халқының мәдениетара­лық диалогін арттыру, дарынды әртістер мен режиссерлерге қолдау көрсету, қа­зір­гі заманғы сахна өнеріндегі жаңа ба­ғыт­тарды анықтау, өскелең ұрпақты пат­рио­тизм рухында тәрбиелеуге атсалысу мақ­­сатын көздегенін ерекше атап өтті.

Форум-фестивальдағы айтулы оқи­ғаның бірі ресейлік режиссер, Мәскеу­дің Станиславский атындағы «Электра» театрының актері Азамат Нығманов қой­ған «Жұт» спектаклінің премьерасы болды. Саяси қуғын-сүргін және ашар­шылық құрбандарының рухына арналған қойылым көрермен тарапынан зор ықы­ласқа бөленді.

Режиссердің өзі бұл тақырыпты не себепті таңдағанын былайша түсіндірді. «Меніңше, – деді А.Нығманов. – Бұл та­қы­рып әлі де толыққанды ашылмаған, ­зерттелмеген. Сонымен қатар бұл дерт қа­зақ халқының жүрегінен өше қойған жоқ. Қоғамға алға қарай жылжу үшін өткеннің қатесін мойындап, оларды түзетпейінше, болашақ жоқ деп санаймын».

Бұдан бөлек, ол тірі екеніңді білдіріп, бүгінгі уақыт алдыға тосқан сауалдарға жауап берудің және көрермендермен қазіргі өміріміз туралы туындылар приз­масы арқылы сөйлесудің театр үшін ең маңызды критерий екенін атап өтті. «Театрға мықты шығармашылық табыс тілеймін, – деді режиссер. – Және ең бас­тысы көрерменмен тығыз байланыс екенін айтқым келеді. Оған көкейкесті мәселелер мен тереңірек тақырыптарды көтеру арқылы қол жеткізуге болады».

Сондай-ақ өнер байқауында драма­тург Иран-Ғайыптың Абай әлемін ұғынды­руға ұмтылдыратын, сол заманның за­рын жүрекке жеткізетін «Мен ішпеген у ­бар ма?» атты қойылымы да көрермен қауым көңілінен шықты.

 Форум-фестиваль аясында Серке Қо­жамқұловтың 125 жылдығына арнал­ған «Қазақ сахнасының ірі тұлғасы» ат­ты көрме ұйымдастырылды. Іс-шара ба­рысында есімі аңызға айналған, сахна майталманы болған өнер қайраткерінің жеке қолданыста болған эксклюзивті заттары, талай жылдық тарихы бар сахна киімдері, бүгінге естелік болған құнды суреттері көрермен назарына ұсынылды.

Сонымен бірге байқау бағдарлама­сы шеңберінде тәжірибе алмасып, жаңа дүние үйренуге деген құлшыныспен келген актерлерге «Сахна қозғалысы» және «Сахна сайысы» бойынша сахнада ер­­кін эмоцияға, сезінуге баулитын шебер­лік сабақтары өткізілді. Мұнда белгілі театр­ және кино әртістері, режиссерлер, өнер­танушылар мен театр мамандары сарап­шылар мен баяндамашылар рөлін атқарды. Павлодар облыстық Жүсіпбек Айма­уытов атындағы қазақ музыкалық драма театрының актері Әбіласан Нұр­жан
шеберлік сағаттарының білімді арт­ты­руға, білгенді одан әрі жетілдіруге көп кө­мегін тигізгенін айтты.

«Бізге Жалынбек Ахан және Фархад Молдағали екі сабақ өткізді. Жалынбек сахнада дем алуды, дұрыс тыныстауды, күш-қуатты ырыққа бағындыруды үйретсе, Фархад аға көзбен жұмыс істеу жайында, сахнадағы серіктесіңе сену арқылы іске асатын дүниелер туралы дәріс берді. Осы фестивальға шақырту алғанда қатты қуанғанымыз рас еді. Себебі білімді арттырып отыру – әр ак­тер­дің, әр маманның қасиетті міндеті. Жал­ғыз Жезқазған қаласында ғана емес, елі­міздің өзге де қалаларында осындай фестивальдар өтсе екен деген тілегіміз бар», дейді ол.

Ал Серке Қожамқұлов атындағы қа­зақ музыкалық драма театрының актері Ардақ Жарқынбеков аталған форум-фестивальдың арқасында пандемияға байланысты өзге қалалардағы әріптестерімен арадағы үзіліп қалған байланыстың қайта жанданғанына қуанышты екенін жеткізді.

«Әріптестерімізбен сағынысып көрі­сіп, тәжірибе алмасып, бар білгенімізді ортаға салдық. Ең алдымен, бізге осындай керемет әсерлерді сезінуге мүмкіндік сыйлаған театрымыздың басшыларына, шақыртуымызды аяқасты етпей, ат терлетіп жеткен қонақтарымызға, неше күн бойы дәріс беріп, актерлік өнердің қыр-сырын ұғындырып жатқан спикерлерге үлкен алғыс білдіреміз», деп ағы­нан жарылды ол.

Ал форум-фестивальды ұйымдас­ты­ру­шы­лардың бірі, Серәлі Қожамқұ­лов атындағы қазақ музыкалық драма театры­ның директоры Досхан Сәкен өнер бай­қауында қатысушыларға мүм­кіндіктерінің қандай деңгейге дейін же­тетінін көрсеткісі келгендіктерін атап өтті. «Олардың Қазақ­стан мен Ресейде ғана емес, әлемнің бар­лық театрында сұранысқа ие екендіктері­не көздерін жет­кізуді мақсат еттік. Бүгін­де бұл фес­ти­вальдың дәрежесі республика­лық дең­гейге жетті деп сеніммен айтуға болады», деп ой қорытты ол.

Аталған өнер байқауына Қостанай, Шымкент, Көкшетау, Қызылорда, Өске­мен, Қарағанды және Жезқазған театрларынан келіп қатысқан жас әртістер, басқа да құрметті қонақтар форум-фестивальдың жоғары деңгейде ұйымдастырылғанын бірауыздан атап өтті.

Жезқазған