Аққудың таза, тәкәппар сұлу қалыбы ғана емес сыңарына ешқашан айнымайтын беріктігі де махаббаттың символы іспеттес болып, бұрын-соңғы ақындардың бәріне шабыт тудырған... Осы орайда биыл ғана көлге қаптаған балдырларды киелі аққу құстың тұмсығымен сыртқа шығарып жүрген «тазалық қызметі» де талай адамды тәнті еткені еске түседі. Бұл көрініс әлеуметтік желілерде кеңінен таралған-ды.
Аққудың тазалығы сондай, маңына қаз-үйректерді де жолатпай, қуып тастайды. Осындай қасиеттерінің бәрі халық арасында оны айрықша құсқа теңейтін аңыздар мен ертегілер туғызған. Оның алқымы қызыл келетін ерекше сұңқылдайтын бір түрі «Қызыл кітапқа» да енгізілген.
Міне, осындай ғажап құсты жуырда солтүстікқазақстандық бір суыққол ашқарақ атып алып, қыл тамағынан өткізбек болыпты. Аққу аңшыдан қорықпайды, адамдар өзін қорғайтынын сезетін болса керек, ол көлдің жағасына дейін келіп, емін-еркін жүзіп-жылжып жүреді. Соны пайдаланған аңшысымақ асыл құсты атып өлтіріпті.
Оқиға Айыртау ауданының аумағында болған. Жергілікті полиция мен қорықшылар бірлесе рейд атқарып жүргенде орманның бауырынан сұңқылдақ аққудың қалдықтарын тапқан. Осы жерде қысқа отын дайындау бригадасы еңбек етіп жатқан. Оқиға орнына келген жедел-тергеу бригадасы жұмысшылардың бірінің «Қызыл кітапқа» енген құсты атуға қатысы бар екендігін анықтады. Анықталған азамат Ғ.Мүсірепов ауданының 32 жастағы тұрғыны болып шықты. Оның тұрғылықты мекенін тексеру барысында аққудың қалдықтары, дара ұңғылы 16 калибрлі «ИЖ-18» мылтығы, атылған гильза мен оқталған патрон табылған. Қазір аталған факті бойынша Қылмыстық кодекстің 337-бабы бойынша қылыстық іс қозғалды. Бұл бап жануарлардың сирек кездесетін және құрып кету қаупі төнген түрлеріне, сондай-ақ пайдалануға тыйым салынған жануарларға қатысты «заңсыз аңшылық» деген жауапкершілікті көздейді.
«Бүгінгі таңда облыста экологиялық қылмыс саласындағы 17 қылмыстық іс тіркелді, 414 аң аулау қағидаларын бұзу және 273 балық аулау қағидаларын бұзушылық анықталды», дейді Жергілікті полиция қызметі басқармасының бастығы, полиция подполковнигі Айдын Байматов.
