«Мастерс» турнирі басталды

Өзгелерді айтпағанда, атағы алысқа жайылған теннисшілердің өздері «Мастерс» санатына жататын айтулы турнирде өнер көр­сетуді үлкен мәртебе санай­ды. Себебі осы бәсекелерге қа­тысу арқылы ойыншылар әлемдік рейтингте жоғарылап қана қоймай, материалдық жағ­­­дайларын жақсарта түседі. Мәселен, биыл Индиан-Уэллс­тегі жарыстың жүлде қоры

8 359 455 АҚШ долларын құрап отыр. Тарқатып айтсақ, ерлер мен әйелдер арасындағы бас жүлде иегерлерінің әрқайсысы

1 209 730 доллардан алады. Ақ­тық сайыста жеңіліс тапқандар сол соманың тең жартысын иеленеді. Жартылай финалға жетсеңіз есепшотыңызға 335 мың доллар аударылады. Ширек финалға шық­қандар 175 мың долларды еншілейді. Төртінші және үшінші кезеңге жеткен ойыншыларға да тиесілі ақша аз емес. Оларға шамамен 92 мың және 52 мың доллар бе­ріледі. Тіпті осы додада бой көр­се­тіп, алғашқы айналымнан аса алма­ған жағдайдың өзінде 18 155 долларды қалтаға басасыз.

Жер-жаһанды жайлаған пан­демияның салдарынан былтыр бұл жарыс өтпей қалды. Ал 2019 жылы ұйымдастырылған додада ерлер арасында аустриялық Доминик Тим алдына жан салмады. Финалда ол даңқты Роджер Федерердің өзін 3:6, 6:3, 7:5 есебімен сан соқтырды. Әйелдер сайысында бас жүлде үшін тартыс германиялық Анжелика Кербер мен канадалық Бьянка Андрееску арасында өрбіді. Бұл бәсеке 6:4, 3:6, 6:4 есебімен Үйеңкі жапырақтар елінен келген қыздың пайдасына шешілді.

Биылғы жарысқа түрлі себептерге байланысты «ұлы үш­­тік» деген теңеу та­ғыл­ған Но­вак Джокович, Ра­фаэль На­даль және Роджер Федерер сынды саңлақтар қатыс­пай­ды. Осының алдындағы жеңім­паз Доминик Тим де бой көр­сет­пейтін болды. Бірақ одан жа­рыстың қызығы еш кеміп қал­майтыны анық. Себебі кортқа шығатындар қатарында басқа да жұлдыздар жетіп артылады. Олардың барлығы да Индиан-Уэллсте барымызды саламыз деп құлшынып отыр.

Турнирдің алғашқы күні Қазақстанның екі теннисшісі кортқа шықты. Юлия Путин­цева германиялық Андреа Пет­ковичтен басым түсті – 7:6, 6:1. Кеше Зарина Диас жапониялық Нао Хибиномен сайысса, Еле­на Рыбакина рейтингінің жо­ғарылығына байланысты жарыс­ты екінші кезеңнен бастайды. Ал Михаил Кукушкин ірік­теу сынының финалын­да аме­ри­калық Эрнесто Эскобедодан ұты­лып қалды – 2:6, 4:6.