Аймақтар • 12 Қазан, 2021

Ауылдастардың бүйірі тоқ

Ел Тәуелсіздігінің 30 жылдығы қарсаңында ауылдың ажарын көрсетіп, жалпақ жұртты игілікті істерге жұмылдыруды мұрат тұтқан «Ауылдың гүлденуі – Қазақстанның гүлденуі» марафоны – ауқымы кең шара.

Байқал БАЙӘДІЛ

Берекесі мол сарыала күздің шуақты күнінде Аршалы кентінің орталық алаңында ұйымдастырылған жәрмеңкеден тұрғындар ет және сүт өнімдерін, алуан түрлі көкөніс пен дәмі тіл үйіретін бал тәрізді өнімдерді базар бағасынан әлдеқайда арзанға сатып алды. Осы бір қадам дастарханның берекесін қашырмауға сеп болатын болса, екінші жағынан ауылда тұрып, ерінбей еңбек етсең, өзің де осындай игілікке ие боласың деген ишараны аңғартып тұрғандай. Алтын бесік – ауылдың шаңырағын биіктететін де, босағасына құт байлайтын да адал еңбек. Тауар өндірушілер табанақы, маңдай терімен өсірген, жинаған азық-түліктерін кент тұрғындарының назарына ұсынуы бірлік пен ынтымақтастықты айғақтап тұрғандай. Бұйырған дәмді бөліп жегенге не жетсін. Әйтпесе, іргедегі Нұр-Сұлтан қаласының сауда сөрелеріне жеткізсе, тұтынушылар пышақ үстінде таласып-ақ алатын дүние.

Жәрмеңкеге «Агрофирма «Поиск», «Николаевское» серіктестіктері мен «Ижевский» өндірістік кооперативі, «Балашов», «Питковский» шаруа қожалықтары тәрізді ұжымдар қатысып, сұранысқа ие азық-түлік түрлерін сауда сөрелеріне үйіп тастады. Бір айта кетерлігі, егде адамдарға жеңілдіктер де қарастырылған.

– Мен қаймағы алынбаған сүттен жасалған сүзбе, қолдың сары майын арзан бағаға сатып алдым, – дейді кент тұрғыны Райгүл Закумбаева, – бір ыңғайлысы, қажетті азық-түлігіңді іздеп, табаныңнан таусылмай, бір жерден аласың. Оның үстіне базар бағасынан әлдеқайда арзан.

Марафон аясында өңірде бірқатар іс-шара өткізу жоспарланып отыр. Жастар ісі оңға басқан фермерлермен, шаруасы шалқыған шаруа қожалықтарының басшыларымен, еңбегін ел елеген сала озаттарымен кездесуді жоспарлауда. Олардың іс-тәжірибесі ауыл шаруасына ықыласы ауған белсенді жастарға бағдар беруі тиіс. «Ауыл – ел бесігі» әлеуметтік желілерінде сурет байқаулары ұйымдастырылып, білім беру ұйымдарында ашық сабақтар өткізіледі. Тәуелсіздік жылдарындағы ауыл шаруашылығы саласындағы жетістіктерді қамтитын мазмұнды фотокөрме де көрермен назарына ұсынылады. Осының барлығы ауылдағы бекем бірлік пен баянды тірліктің қаншалықты бағалы екендігін қолмен қойғандай етіп көрсетуі тиіс.

Ақмола облысы,

Аршалы ауданы

Күннің маңызды және өзекті жаңалықтарын «Егемен Қазақстан» телеграм каналынан оқыңыз