Инновация кепілі

Әлемнің дамыған елінде инновациялық жаңа жобаларды экономиканың, жаңа технологияның жетістіктері ретінде қарайтындығы белгілі, өйткені инновация дегеніміз – еңбек өнімділігін айтарлықтай арттыратын іс. Әсіресе, ин­новациялық білім технологияларын өмір салаларына енгізу – жаңалықтың жаршысы болып табылады. Міне, бұл орайда Елбасы Жолдауында айтқандай, инновациялық технологияларды дамыту, жаңа бас­­та­маларды өмірге ендіру жалпы­ елімізді дамытудың жолдары. Соның бір дәлеліндей, жақында Президент жанындағы Мемлекеттік басқару академиясында да алғаш рет «А» корпусының мемлекеттік қызметшілерін онлайн-қашықтықтан оқыту» инновациялық жобасы өз жұмысын бастады. Бұл тынымсыз дайындық жұмыстары арқасында жүзеге асырылған екен. Осылайша академияда шетелдердің жетекші ғылыми орталықтарының ин­но­вациялық технологиялары­на негізделген, «А» корпусын­ оқыту үшін іргелі, іс-тәжірибеге ұштастырылған онлайн-қа­шық­тықтан модульдері құрастырылған көрінеді. Сөйтіп, аталған басқару академиясы өзінің қазіргі ком­му­никациялық жабдықтарын пайдалана отырып, «А» корпусының басқарушыларына Қазақстан Республикасындағы стратегиялық жоспарлау мен бюджеттеу; мемлекеттік органдардағы кадр­лар менеджменті; басқарушылық шешімдерді әзірлеу мен қабылдау пәндерін зерделеу бойынша инновациялық білім технология­лары саласына енуге мүмкіндік берген. Оқудың соңғы кезеңінде академияның профессор-оқы­ту­шылар құрамы, курстың тың­дау­шылары бірқатар тренингтер, атап айтқанда, Академияның психолог оқытушыларының басшылығымен «А» корпусының мемлекеттік қызметшілерінің құзыреттігін дамыту үшін коуч-тренингтер ұйымдастырып, өткізеді. Ал академия «А» корпусы үшін олардың кәсіби, басқарушылық және тұлғалық құзыреттерін тиімді іске асыруға мүмкіндік беретін білімді қалыптастыру мақсатында қолайлы жағдай туғызады. Оқыту барысында тәжірибелік құрам бөлігі оқитындар үшін кейстер дайындау түрінде айқындалатын болады дейді. Кейстермен жұмыс «А» корпусына алғаш тағайындалған мемлекеттік қызметшілерге командамен жұмыс істеу, тиімді басқарушылық шешімдерді қабылдау, ақпарат көздерімен және тығыз уақыт шеңберінде жұмыс істей білу дағдыларын көрсетуіне мүмкіндік беретіндігі сөзсіз. Курсты ойдағыдай игерген мемлекеттік қызметшілерге қайта даярлаудан өткенін растайтын құжат тапсырылады. Сөйтіп, осы жылы «А» корпусына алғаш тағайындалған әкімшілік мемлекеттік қызметшілердің 5 қайта даярлау курсын ұйымдас­ты­ру жоспарланған. Атап айта кетер жәйт, бұл жобаны іске асы­ру Мемлекет басшысының мем­лекеттік қызметшілерді оқыту үрдісін жаңғыртуға байланысты нақты тапсырмаларын орындауға негізделген. Александр ТАСБОЛАТОВ, «Егемен Қазақстан».