Кісі өлтірген прокурор көмекшісі қызметінен босатылды

31 жастағы Павел Рульді көлігімен басып өлтірген Теміртау прокурорының көмекшісі Қаныш Мамалинов тәртіптік кеңестің ұсынысымен қызметінен босатылды. Бұл туралы «Интерфакс-Қазақстан» агенттігі хабарлады. Агенттік тілшісімен болған әңгімеде прокуратура қызметкерінің бірі әріптесінің кінәсінен жол апаты орын алғанын жоққа шығармапты. Ал тергеу барысында жол ережесін бұзған айыпкер иелігіндегі көліктің техникалық тексеруден өткендігі туралы куәліктің жалған екені анықталды. «Қаза болған жігіттің туыстары айыпкермен татуласқанымен, қылмыстық істі тоқтату жөнінде арнайы қаулы шығарылған жоқ. Сондықтан орын алған жол апаты жан-жақты тексерілуде», - делінген облыстық прокуратураның баспасөз қызметі таратқан мәлімдемеде. Осының алдында Теміртау қаласының прокуроры Нұржан Сүгірәлиев бұқаралық ақпарат құралы өкіліне берген сұхбатында былай деген еді: «Сараптама нәтижесі Қаныш Мамалиновтің ішімдік ішпегенін дәлелдеді. Орын алған оқиға абайсызда жасалған қылмыс болып есептеледі. Жалпы, бұған байланысты нақты тұжырымды тергеу амалдары аяқталған соң, айта аламыз». Әмірхан Алмағанбетов. Дереккөз: «Интерфакс-Қазақстан». Фото: Nordovia-news.ru.