Күздің өңменіңнен өтер қара суығы қалтыратқанымен, жүректі қуаныш оты жылытып тұр. Ол қуаныш – ата-бабасының кіндік қаны тамған топырақты аңсап алыстан жеткен қандастарды қарсы алу сәті. Жүрдек пойыздан алдымен томпаңдап бала түсті. Жақсы ырымға баладық: балақайдың болашағы атажұртында бүр жармақ. Атбасар ауданы әкімінің орынбасары Қуаныш Өмірзақ үстіндегі жылы күртесін шешіп алып күзгі ызғардан сәл тоңазыған баланың иығына жапты. Күрте емес, алыстан жеткен ағайынға деген жалпақ жұрттың ыстық ықыласы осылай меңзеліп көрсетілгендей болды.
Облысқа табан тіреген отбасылардың құрамында 35 адам бар. Олардың 21-і ер-азамат болса, 14-і әйелдер. Араларында кішкентай нәресте де бар.
– «Еңбек» мемлекеттік бағдарламасы аясында қандастарымызға барлық жағдай жасалады, – деді облыстық Жұмыспен қамту және әлеуметтік бағдарламаларды үйлестіру басқармасының басшысы Дина Ахметжанова. – Тұрғын үй мәселесі демеушілердің көмегімен шешілмек. Жаңа ортаға бейімделіп кеткенше теологтер мен психилогтер көмек көрсетеді.
Лейла Озбакидің отбасы Көкшетау қаласындағы «Новопэк» компаниясының жатақханасына орналастырып, еңбекке жарамды адамдар жұмыспен қамтылып, балалары «Қарлығаш» балабақшасы мен №18 орта мектепке баратын болды. Атбасарға құрамында 12 адамы бар Ахмади Мохаммад Ханифтің отбасы қоныстанбақ. Олар Мариновка ауылындағы 120 шаршы метрлік бес бөлмелі үйде тұратын болады. Бурабайға бет алған қандастар Кіндікқарағай ауылында ірге теуіп, шаруа қожалықтарында жұмыс істемек. Қаймағы бұзылмаған қазақ ауылының керегесі қандастармен кеңейетін болды. Дерман Малиханың отбасы Сандықтау ауданының Веселое ауылына бет алды. Ересектер «Байдалы» жауапкершілігі шектеулі серіктестігіне орналастырылады. Балалары қазақ тілінде тәлім-тәрбие беретін мектепке беріледі.
Жұмысқа жарамды ағайындардың барлығы жұмыспен қамтылса, мектеп жасындағы балаларға жалпы білім беру қоры арқылы қажетті киім-кешек, оқу құралдары бөлінетін болды. Қилы заманда шекара асып, шерменде болған қандастарымыздың бүгінгі ұрпағының атажұртта тамыр жаюына барлық жағдай жасалмақ.
