Қазақстан • 13 Қазан, 2021

Жануар да мейірімге мұқтаж

629 рет
көрсетілді
3 мин
оқу үшін

Жануарларға қатыгездік көрсеткендер 120-дан 200 АЕК-ке дейін, ал қайталаған жағдайда 1 мың АЕК-ке дейін немесе бір жылға дейін бас бостандығынан айырылуы мүмкін. Мұндай жаза «Жануарларға жауапкершілікпен қарау туралы» заң жобасында қарастырылып отыр.

Жануар да мейірімге мұқтаж

Бұл туралы Экология, геология және табиғи ресурстар вице-ми­нистрі Әлия Шалабекова айтты. Ведомство өкілінің айтуына сүйенсек, заң жобасының арнайы ба­бында жануарларды өлтіру және оның өлекселерімен жұмыс істеу ережелері қамтылған. Атап айт­қанда, жануарларды өлтіруге рұқ­сат берілетін жағдайлар және оны іске асыру кезінде, оның ішін­де ветеринария саласындағы ұлт­тық заңнаманың міндетті түрде сақ­талуы тиіс талаптары анықталды.

«Бұдан басқа, заң жобасында жекелеген санаттағы жануарлар­ды мәдени ойын-сауық және зерт­ханалық мақсатта, сондай-ақ үй жануарлары мен қараусыз қал­ған жануарларды ұстау және қарау кезіндегі талаптар айқын­далды. Сонымен қоса осы салада қоғамдық бақылау институты қарастырылмақ. Жануарларды күтіп ұстау бағытында «қоғамдық инс­пекторлар» ұғымын енгізу ұсынылды. Аталған бағытта қо­ғамдық бақылау жүргізудің дәл­ме-дәл тәртібін уәкілетті орган анық­тайды. Жергілікті атқару­шы органдарға жануарлар пана­лайтын орындар туралы ақпа­раттық сүйемелдеуді қамтамасыз ету, нақты айтқанда, жануарлар­ды иелеріне қайтарып беруге арналған әлеуметтік жарнаманы, сол секілді жоғалған жа­нуар­лардың қожайындарын іздеу және үй жануарларын биотазалаудан өткізу қажеттілігі туралы хабарды ұйымдастыру құзыреті беріледі», деді Ә.Шалабекова.

Вице-министр айтқандай, егер де жануарларға жауапты азамат­тардың қажетті жағдай жасауға мүмкіндігі болмаса, онда олар тір­­шілік иелерін биотазалаумен қам­тамасыз ету керек. Ал 2023 жылдың 1 қыркүйегінен бастап үй жа­нуарларына ақылы негізде чип салдыру қажет деді министрлік өкілі.

«Аталған заң жобасында жа­нуар­дың өмірі мен саулығына байланысты азаматтардың жеке жауапкершілігі, оның ішінде әкім­шілік және қылмыстық жа­уапкершілік (жануардың өліміне әкеп соққан құқық бұзушылық үшін жаза қатаңдатылды – 120-дан 200 АЕК-ке дейін, ал қайталап бұзған кезде 1 мың АЕК-ке дейін немесе бір жылға дейін бас бостандығынан айыру) қарас­тырылып отыр. Осы ре­форма жануарларға көрсе­тіле­тін қатыгездіктерді тыяды деп санаймыз. Оның ішінде иттер­дің төбелесі, анестезиясыз ве­теринарлық операциялар жүргізу, жануарларды еш себепсіз өлтіру, жануарларды аш қалдырып, уақ­тылы көмек көрсетпеу, сол секіл­ді зақым келтіріп аулау әрі жануар­лардың еті мен майын пайдалануды айтуға болады», деді Экология министрінің орынбасары.

Заң жобасындағы ережелерді іске асыру үшін Қылмыстық кодекске, «Әкімшілік құқық бұзу­шылық туралы» кодекске, сондай-ақ «Жергілікті мем­лекеттік бас­қару және өзін өзі бас­қару туралы», «Ветеринария туралы», «Жануарлар дүниесін қорғау, өсі­мін молайту және пайдалану туралы» заңдарға өзгерістер мен то­лықтырулар енгізуге тура келеді.