Жарыс жолына 102 кг салмақ дәрежесінде күш сынасып жүрген Рахат Бекболат шыққанда оның бас жүлдені олжалайтынына күмәнданғандар кемде-кем еді. Себебі ол бұған дейін де жасөспірімдер мен жастар арасында әлем және құрлық чемпионы атанып, сан рет рекордтық көрсеткішті жаңартты. Сыр бойының жас саңлағы ересектер дуына да еркін қосылып, бірқатар дүбірлі додада мықтылығын мойындатты.
Р.Бекболат Жиддадағы жарыста да жасындай жарқылдады. Қоссайыстың қорытындысы бойынша 355 (155+200) кг зілтемірді еркін еңсерген ол бас жүлдені қанжығасына байлады. Күміс медальды иеленген Түркияның тастүлегі Танер Чаглар қандасымыздан 18 кг кем көтерді. Қола жүлде Ирак спортшысы Аммар Рубайави Алиге бұйырды.
Сондай-ақ кеше Руфина Шалқарованың да асқан шеберлігіне тәнті болдық. +81 кг салмақта сынға түскен ол 247 (107+140) кг көрсеткішпен алтыннан алқа тақты. Өзге зілтеміршілер қазақ қызына жарытып қарсылық та көрсете алмады. Мәселен, екінші орынға табан тіреген бразилиялық Тиана Жустино Руфинадан 28 кг кем көтерді. Үшінші сатыға түркиялық Фатмагүл Чевик жайғасты. Оның көрсеткіші – 203 кг.
