Марапаттау рәсімінде сөз алған КСРО халық әртісі, Мемлекеттік сыйлықтың лауреаты, байқаудың қазылар алқасының төрағасы Бибігүл Төлегенова айтулы іс-шараның мазмұнды өткендігін айта келіп: «Бізге үздіктерді таңдау оңай болған жоқ, дегенмен ең мықты орындаушы жеңіске жетті. Енді жаңа жұлдыздар әлемнің озық сахналарында еліміздің атын шығарады деп сенемін. Байқаудың қалыптасуына Елбасының орасан зор қолдауы болды. Бүгінде оған жоғарғы деңгейде көңіл бөлінуде. Мемлекет басшысы Қасым-Жомарт Тоқаев өз хатында байқау қатысушыларына жүрекжарды тілегін арнады. Меніңше, бұл баршамызды одан сайын шабыттандыра түседі. Мәдениет және спорт министрлігіне де ризашылығымды білдіремін!» деді халқымыздың күміс көмей әншісі.
Айта кетейік, екі кезеңнен тұрған халықаралық байқауға қатысуға елуден астам үміткер өтінім берсе, олардың басым бөлігі Қазақстан, Ресей, Қырғызстан, Башқұртстан және Өзбекстаннан келіп түскен.
Бірінші сыйлықты – Ресейден келген Габриель Де-Рель мен өзбекстандық Атабек Назиров және жерлесіміз Әлихан Зейнолла алса, екінші сыйлықты – қазақстандық Ұлпан Әубәкірова, Әсем Әубәкірова және Өзбек елінен келген Азиза Мухамедова иеленді.
Сондай-ақ «Астана Опера» театры Дінмұхамед Көшкінбаев пен Әсем Әубәкіроваға Astana Opera халықаралық опера академиясында ай сайынғы стипендиямен оқуға арналған сертификатын табыс етті.
