Қарқын

Битум зауыты... Бұл біздің елімізді өзгеден бұйым сұрау тәуелділігінен құтқарып, өз қажетімізді өзіміз өтей бас­тауы­мыздың белгісі. Жуырда, яғни өткен жылдың жел­тоқ­сан айында Мемлекет басшысы алдында телекөпір арқылы іске қосылған зауыт қазір алғашқы өнімдерін бере бастады.

 

Ақтау пластикалық масса­ зауы­тына жол битумдары өнді­рі­сі – 2010-2014 жылдарға арнал­ған үдемелі индустриялық-инно­ва­циялық даму мемлекеттік бағ­дар­ламасының жемісі. Зауыт жұ­мысы жоғары сапалы жол битум­дарын өндіру үшін тиімді бо­лып табылатын «Қаражанбас» кен орнынан жылына 1 млн.тонна мұнай өңдеуге негізделген. Мұ­найдан өндірілген тотыққан би­тум Қазақстанның барлық жол-климаттық аймақтарына тө­зімді келеді. Екі түрлі маркалы­ то­тыққан битум өндірісінің кө­лемі жылына 406 мың тоннаны құрамақ. Ақтау битум зауытында дайындалатын полимерлі-модификацияланған жол битумы Қазақстанда бұрын өндірілмеген, сол себепті жол құрылысында қолданылмаған инновациялық жол материалы болып табылады. Ыстық пен суыққа төзімді, жолдың жарамдылық мерзімін ұзартып, олардың жөндеу шығындарын айтарлықтай азайта­тын аталмыш бұйымның жылына 120 мың тоннасын шығару жоспарланған. Би­тум сапасының жоғалмауы  үшін өнім өндірушілер жол битумдарын бір жол­ғы полимерлі көліктік ыдыстың екі тү­рі­не – биг-бэги (1000 кг) және қаптарға (40 кг)  бөлшектеп орауды қолға алып отыр. Өлшеніп оралған салқын битумды қолдану тек материалдың бастапқы физика-химиялық көрсеткіштерін сақтауға ғана емес, сонымен бірге, үлкен көлемді битум қоймаларында битумдарды балқымалы түрде ұстаудағы шығындардың азаюы есебінен асфальт-бетон зауыттарында үнемділікке қол жеткізеді. Бүгінге дейін 5 мың тоннадан астам битум мен 7 мың тоннадан астам вакуумдық газойль дайындап үлгерген зауыттың болашақта өз өнімділік аясын кеңейте түсу межесі бар.  Сәуір айында толық қуатына еніп жұмыс жүргізуді жоспарлап отырған өндіріс орны 286 адамды жұмыспен қамтыған. Қытайлық әріптестерінен үйрену арқылы өндірісті тиімді жүргізу бағытында тәжірибе жетілдірген мамандар жұмысқа тың күшпен кіріскен.  Алдымен өңірдің, еліміздің ішкі қажеттілігін қамтамасыз етіп, кейін сырт елдерге экспортқа шығарылатын жол битумы  шағын болса да ел экономикасына оң әсер ететін өндіріс көздерінің бірі болады деп күтілуде. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы. ---------------------------------------- Суреттерді түсірген С.МАЙЕМЕРОВ.