13 қазанда кешке сағат 20:27-де Пичугин көшесіндегі 5 қабатты тұрғын үйдегі өрт туралы хабарлама келіп түсті. Өтініш беруші өртеніп жатқан пәтерде балалар болуы мүмкін деді. Шақыру орнына жедел келген өрт сөндірушілер дереу адамдарды құтқаруға кірісті.
«Барлау жүргізген кезде 3-қабаттағы пәтердің асүйінде жалпы көлемі 6 шаршы метр жердің жанғаны анықталды. Қатты түтін салдарынан кіреберістегі пәтерлерден бірнеше тұрғын өздігінен шыға алмай қалған. Өрт сөндірушілер құтқару қалпақтарын қолдана отырып, кіреберістен 10 адамды, оның ішінде жанып жатқан пәтердің үстіндегі пәтерде болған 2 баланы алып шықты.
Тепловизордың көмегімен барлық іргелес және жақын орналасқан пәтерлер тексерілді. Қабылданған шаралардың арқасында өрт 21:05-те сөндірілді.
Алдын ала болжам бойынша өрт электр сымдарының қысқа тұйықталуынан шыққан», деп мәлімдеді Қарағанды облысы ТЖД баспасөз қызметі.
Өткен тәулікте Қарағанды облысы Төтенше жағдайлар департаменті бөлімшелерінің қызметкерлері 20 рет шақыртуға шыққан, оның ішінде өрт сөндіруге 12 рет, авариялық-құтқару және іздеу жұмыстарына 8 рет барды.
Жалпы есептегенде 17 адам құтқарылды. 5 өрт электр сымдарының қысқа тұйықталуынан болғаны анықталды. Бұл ретте пештер мен түтін мұржаларын орнату кезінде өрт қауіпсіздігі ережелерінің бұзылуы оттың тұтануына себеп болған.
