Альпинистік клубтың мүшелері шыңға шығар ең қиын жолды таңдап, жорықты таудың Шабанбай би аулының желке тұсындағы етегінен бастады. Оларға жолды Ақтоғай ауданы әкімінің орынбасары Абылай Аманжолов көрсетіп отырды.
Экспедиция жетекшісі, кәсіпкер, Қарағанды қалалық мәслихатының депутаты Төлеген Әшімов альпинизмнің саламатты өмір салтын насихаттаудан бөлек, адамдарды жақындастыратын, бауырмалдыққа баулитын ерекше қасиеттері бар екенін айтады.
– Болашақта клубтың Ақтоғай ауданындағы үйірмесін ашпақ ниетіміз бар. Ақсораңдай биік шыңы, ғажайып табиғаты бар аумақта альпинизммен қоса экотуризм де дамыса, нұр үстіне нұр болар еді, – дейді ол.
Клубтың мүшелері Шабанбай би ауылындағы Ә.Ермеков атындағы мектепке барып, оқушылармен кездесті. Білім ұясында экспедиция құрамында болған облыстық ішкі саясат басқармасының басшысы Ерлан Құсайын Алаш көсемі Әлихан Бөкейханның 15 томдық еңбегін мектеп ұжымына тарту етті.
Сонымен бірге Төлеген Әшімов Абайдың «Қарасөздерінің» өлеңмен аударылған екі томдығын, Мәшһүр Жүсіп Көпейұлы туралы туындыны және ауған соғысының ардагері, полковник Амангелді Жантасовтың кітабын сыйға тартты.
Оқушылармен болған кездесу барысында Skif-Qaragandy альпинистік клубының жетекшісі Төлеген Әшімов пен кәсіби альпинист Михаил Нартов тауға өрмелеу өнері және экотуризм туралы әңгімелеп, алдағы уақытта оқушыларға онлайн режімде және жүзбе-жүз дәріс оқудың мүмкіндіктерін қарастыруға уәде берді.
