Буллитте басым түсті
Құрлықтық хоккей лигасында бақ сынап жатқан елорданың «Барысы» кезекті сырт алаңдағы ойындар сериясын жеңіспен бастады. Қытайдың «Куньлунь Ред Стар» клубымен кездескен жерлестеріміз буллит сериясында үстемдік танытты.
Мәскеу облысындағы «Мытищи Аренада» («Куньлунь» өз айдынындағы ойындарын Ресей жерінде өткізіп жатыр) ұйымдастырылған бәсекенің негізгі уақыты 1:1 есебімен тең аяқталды. Матчтың бірінші кезеңінде хоккейшілер бір-бірінің қақпасына гол соға алмады. Дегенмен үзілістен кейін Юрий Михайлис шәкірттері мұзайдында белсенді қимылдады. Нәтижесінде, ойынның 21-минутында Олле Альсиннен тамаша пас алған Никита Михайлис қарсылас қақпасын дәл көздеп, командасын алға шығарды.
Үшінші кезеңде «Куньлунь» хоккейшілері барын салды. 58 минут бойы Ортио қорғаған қақпадан саңлау таба алмаған қытайлықтар матчың аяқталуына екі минут қалғанда таразы басын теңестіріп кетті. Шайба авторы – Тайлер Вонг. Осылайша негізгі уақыт тең аяқталған соң, кездесу овертаймға ұласты. Бірақ бұл кезеңде де жеңімпаз анықталған жоқ. Ал буллит сериясында «Барыс» ойыншылары дәлдік танытты. Қорытынды есеп – 2:1, «Барыстың» пайдасына. Жерлестеріміз бұл жеңісінен кейін «Шығыс» конференциясындағы турнир кестесінде екі саты жоғарылап, 7-орынға тұрақтады.
Жеті күндегі екінші жеңісі
«Астана» велоклубының қазақстандық көшбасшысы Алексей Луценко бір аптаның ішінде екінші мәрте Италия тас жолдарында өткен бір күндік веложарыстың жеңімпазы атанды.
Өткен аптада «Коппа Агостони» додасында үздік шыққан қазақстандық велошабандоз бұл жолы Италияның солтүстік-шығысында тек ақ қиыршық тас жолдар бойымен өткен дебюттік «Серениссима Гравел» бір күндік жарысында топ жарды.
Алексей Луценко 132 шақырым қашықтықты 3 сағат 24 минут 14 секундта жүріп, тұңғыш рет ұйымдастырылған жарыстың бас жүлдесін жеңіп алды. Екінші және үшінші орындарды иеленген италиялық Риккардо Минали мен аустралиялық Натан Хаас жерлесімізден 42 секундқа қалып қойды. Сонымен қатар «Астананың» тағы екі өкілі – Давиде Мартинелли (4-орын) мен Самуэле Баттистелла (9-орын) үздік ондықтың қатарынан көрінді.
Финалда сүрінді
Қазақстанның бірінші, әлемнің 16-ракеткасы Елена Рыбакина АҚШ-тың Индиан-Уэллс қаласында өткен BNP Paribas Open WTA 1000 турнирінің жұптық бәсекесінде ресейлік Вероника Кудерметовамен бірге өнер көрсетіп, бас жүлдеге қол созым жер қалғанда сүрінді.
Қазақстандық-ресейлік жұп финалда бельгиялық Элизе Мертенс пен тайвандық Се Су-Веймен кездесті. 1 сағат 34 минутқа созылған ойында Рыбакина мен Кудерметова қарсыластарынан 6:7(1:7), 3:6 есебімен жеңіліп, екінші орынға табан тіреді. BNP Paribas Open финалына шыққаны үшін Елена мен Вероника 650 рейтингтік ұпай мен 220 мың АҚШ долларын қанжығаларына байлады. Айта кетерлігі, бұл Рыбакина мен Кудерметованың бірге ойнаған екінші турнирі. Бұған дейін олар тамыз айында Монреалда (Канада) өткен жарыстың жартылай финалына дейін жеткен еді.
Дайындаған Әли БИТӨРЕ
