Спорт • 21 Қазан, 2021

Қарсыластар анықталды

38 рет көрсетілді

Нидерландтың Зейст қаласында футзалдан 2022 жылғы Еуропа чемпионатының топтық кезеңіне жеребе тарту рәсімі өтті. Нәтижесінде, Қазақстан құрамасы Италия, Словения және Финляндиямен бірге В тобында сынға түсетін болды. УЕФА рейтингі бойынша Қазақстан құрамасы жеребе алдында Испания, Ресей және Португалия құрамаларымен бірге бірінші себетте орналасқан болатын.

2022 жылғы ең үлкен жарыс­тың бірі саналатын футзалдан Еу­ропа чемпионатында биыл ал­ғаш рет 16 құрама (бұған дейін 12 команда сынға түскен) бақ сы­на­мақ. 19 қаңтар мен 6 ақпан ара­лығында Амстердам және Гро­нинген қалаларында 32 матч ойналады. Әр топ төрт командадан тұрады.

Алғаш рет кәрі құрлық бірін­ші­лігінің финалдық кезеңін қабыл­дайтын Нидерланд құрамасы Еуро-2022 финалдық ойындарына тікелей жолдама алды. Қалған елдердің ішінде Португалия (Еуро-2018 жеңімпазы), Әзербайжан, Бос­ния және Герцеговина, Хор­ватия, Финляндия, Грузия, Ита­лия, Қазақстан, Польша, Ресей, Сло­вакия, Словения, Испания және Ук­раина бар. Сербия мен Бе­ла­русь құрамалары құрлық дода­сының соңғы жолдамасын 14 және 17 қа­раша күндері сарапқа салады.

Құрамамыз топтық кезеңдегі алғашқы екі матчын Гронинген қаласында, ал соңғы ойынын Амс­тердамда өткізеді. Ойындар кесте­сіне сәйкес Қазақстан құрамасы 20 қаңтарда Словения, 24 қаңтарда Финляндия және 28 қаңтарда Ита­лия құрамаларымен кездеседі.

Жеребе тарту рәсімінен ке­йін футзалдан Қазақстан құра­ма­­­сы­ның бас бапкері Пауло Ри­кар­­до Кака Қазақстан фут­бол фе­де­рациясының баспасөз қыз­метіне сұхбат беріп, топтағы қар­сы­ластар туралы өз пікірін ортаға салды.

– Менің ойымша, барлық топ­қа мықты қарсыластар жиналды. Ешбірін бөле-жарып, мына құрама әлсіз немесе мынау мықты деп айта алмаймын. Өйткені чем­пио­натқа осал құрамалар қатыс­пайды. Барлық 16 команда жақ­сы деңгейде. Бірінші матчты Сло­вениямен өткіземіз. Бұл құра­мамен әлем чемпионатының ірік­теу кезеңінде ойнадық. Олар тех­­ника жағынан өте мықты. Бұл кез­­­десуде бізге 2018 жылғы Еу­ро­па чемпионатының соңғы мат­чын­­­да «қызыл қағаз» алып, алаң­нан қуыл­ған Дуглас көмектесе ал­майды.

Финляндия құрамасы туралы айтатын болсам, олардың құра­мында шеберлік деңгейі жоғары ойыншылар жоқ. Дегенмен өте жинақы команда. Қазір Италия құрамасында буын алмасу кезеңі жүріп жатыр. Бұрын Италия сапында 10-ға жуық бразилиялық ойнаған болса, қазір олардың құрамында жергілікті ойыншылар көп. Чемпионатқа дайындықты 3 қаңтарда бастаймыз. Сондай-ақ 13 және 15 қаңтарда екі жолдастық кездесу өткізуді жоспарлап отырмыз. Бізде қарсыластармен алдын ала келісім бар.

– Жарты жыл ішінде екі бірдей ірі турнирде бақ сынау, әрине, оңай емес. Өте тығыз күнтізбемен жұмыс істеп жатырмыз. Алайда біз бұл факторды өз пайдамызға жаратуымыз керек. Мақсат – қиындық туралы ойланбай, паркетке шығып, әр ойында жеңіске жету, – деді Кака.

2018 жылы Словенияның Любляна қаласында өткен Еуро­па чемпионатында Қазақстан құ­ра­масы үшінші орын үшін өткен бә­секеде Ресей футзалшыларынан жеңіліп, төртінші орынға табан тіреген еді.

Соңғы жаңалықтар

Қазақстанда алтын қоры өсті

Экономика • Бүгін, 09:35

Бір тәулікте 683 науқас тіркелді

Коронавирус • Бүгін, 09:19

Халықты ревакциналау тәсілі өзгерді

Коронавирус • Бүгін, 09:15

Балық па, әлде жылан ба?

Аймақтар • Бүгін, 09:07

Үздік шетелдік ойыншы атанды

Теннис • Бүгін, 09:04

Індет кезінде тыныштық та ем

Коронавирус • Бүгін, 09:02

Ташкенттегі жарыс табысты басталды

Ауыр атлетика • Бүгін, 09:01

Ұшақ билеттері қымбаттады

Қоғам • Бүгін, 08:51

Ұқсас жаңалықтар