Тұңғыш медаль – қолда!

Сүйінші, ағайын, сүйінші! Газетке енді қол қойылғалы жатқанда, сағат түнгі 01-ден жаңа ғана өте бергенде теледидардың тікелей эфирі Сочиден тамаша сәтті көрсетті. Қазақстан құрама командасының үкілеген үміті – мәнерлеп сырғанаушы Денис Тен бүкіл елге қуаныш сыйлады – ХХІІ Олимпия ойындарында тұңғыш медалімізге қолымызды жеткізді. Денис шын мәнінде мүмкін еместі мүмкін етті деудің ешқандай артығы жоқ. Иә, мұның алдындағы қысқа бағдарламада тоғызыншы орынға ғана тұрақтаған спортшымыз кеше еркін бағдарламада тамаша өнер көрсетіп, төрешілерден 171,04 балл алды. Сөйтіп, өзінің алдына жапониялық Юдзуру Ханю мен канадалық Патрик Чанды ғана салып, Олимпиада жүлдегері атанды. Денис Теннің қола медалі – Қазақстан спорты тарихындағы мәнерлеп сырғанаудан алынған алғашқы награда. Қуаныш құтты болсын! Дереккөз: «Егемен Қазақстан». Фото: Sochl.ru 2014.