Елбасының қамдағаны – елге қамқорлық
Тәуелсіздіктің алғашқы жылдарында елімізге шетел инвестициясын салуға ынта танытқан инвестордың бірі – «Шеврон» корпорациясы. Ел Үкіметі мен аталған инвестордың қатысуымен құрылған «Теңізшевройл» бірлескен кәсіпорнының «Теңіз» кенішін игергеніне 20 жылдан асты. Осы кезеңде тек мұнай өндіріп қана қоймай, өңірдің әлеуметтік мәселелерінің оң шешілуіне де кеңінен атсалысып келеді. «Әлеуметтік салаға инвестиция бөлудегі негізгі ұстаным бизнестің әлеуметтік жауапкершілігі мен этикасын сақтай отырып, жергілікті кәсіпкерлік пен қауымдастықты барынша қолдау», деп түсіндіреді «Теңізшевройл» бірлескен кәсіпорнының бас директоры Тим Миллер. «Теңізшевройл» 2009 жылдан бері әлеуметтік серіктестікке негізделген әлеуметтік инвестициялардың әдеттегі филантропиялық моделінен бас тартып, бұл күндері әлеуметтік маңызды мәселелерді шешуде тәжірибесі мол үкіметтік емес ұйымдармен жұмысын жалғастыруда. Осы орайда жылдық бюджеті 1 миллион АҚШ долларын құрайтын әлеуметтік инвестициялар бағдарламасы денсаулық сақтау, білім беруге бағытталған жобаларды табысты жүзеге асыруға мүмкіндік беруде. Дегенмен, бірлескен кәсіпорынның әлеуметтік инвестициясы кез келген бағдарламаны қаржыландыруға жұмсалмайды.
Кәсіпорын бөлімдерінің білікті мамандарынан құралған әлеуметтік инвестициялр жөніндегі кеңес жыл сайын үкіметтік емес ұйымдардың жобаларын терең талқылап, жергілікті халыққа берер пайдасына, өңірдің өзекті әлеуметтік мәселелерін шешуге оң ықпал ететіндігіне байланысты түпкілікті шешім қабылдайды.
Соңғы жылдары бірлескен кәсіпорынның осы саладағы жобалары маңыздылығымен ерекшеленді. Мәселен, Қазақстанның отбасылық дәрігерлер ассоциациясымен бірлескен жобада қан қысымының жоғарылауының түрлі себептеріне талдау жасалды. Ал академик З.Қабдолов қорымен бірлесе өткізілген «Мен қазақша білемін!» атты жобаға өңірдегі өзге ұлттың өкілдері көптеп қатысып, мемлекеттік тілді меңгерудегі қадамына қолдау жасалды.
Осындай жобаларымен елдің, ұлттың саулығы мен мүддесін көздеген бірлескен кәсіпорын 1993 жылдан бері Атырау облысындағы әртүрлі әлеуметтік жобаларға 860 миллион АҚШ долларынан астам қаржы жұмсады. Енді биылғы жылы да мұнайлы өңірдің денсаулық сақтау және білім беру салаларына қолдау көрсету мақсатымен әлеуметтік инвестициялар бағдарламасына 1 миллион АҚШ доллары көлемінде қомақты қаржы салғалы отыр.
Сонымен қатар, «Теңізшевройл» өз қызметкерлерін әлеуметтік тұрғыдан қолдауды басты қағида ретінде ұстанады. Осыған дәлел ретінде әр жыл сайын әр қызметкердің жалақысына үстеме қосылатынын айта аламыз. Ал биылғы ақпан айынан бастап бірлескен кәсіпорынның ортақ табысына өз үлесін қосқан қызметкерлер жалақысы 10 пайызға өсірілді. «Теңізшевройлдың» бас директоры Тим Миллердің айтуынша, ұжымның әр мүшесіне әрдайым қолдау көрсетіліп келеді. Мұндай әлеуметтік маңызды қолдау алдағы уақытта да жалғастырыла бермек. Бас директор Т.Миллер ұжым мүшелерін алдағы 1 сәуірден бастап қызметкерлердің басым бөлігі үшін жалақы 9 немесе одан да артық пайызға өсетіндігімен қуантып отыр. Осылайша, «Теңізшевройл» бірлескен кәсіпорны жыл басынан бері өз қызметкерлерінің жалақысын екінші рет өсіруді қолға алмақ.
– Өткен аптада Қазақстан Президенті Нұрсұлтан Назарбаев ірі компанияларға өз қызметкерлерінің жалақыларын 10 пайызға арттыруға ұсыныс жасады. Мемлекет басшысының бұл ұсынысы «Теңізшевройл» басшылығы тарапынан кең қолдау тауып, қызметкерлер жалақысын өсіруге шешім қабылдадық. Біздің кәсіпорын осы шешімі арқылы Президент тапсырмасын алғашқылардың қатарында орындап отыр, – деді бас директор Т.Миллер.
Бас директор жалақыға қосылған 10 пайыздық арттыру, кейінгі сәуір айындағы жоспарланған жалақы мөлшерін көтеру «Теңізшевройл» басшылығының ең үздік мұнай және газ өндіруші кәсіпорындарының қатарына қосудағы қызметкерлердің тынымсыз еңбегін орынды бағалап, олардың алдындағы міндеттемесін орындап отырғандығы, деп атап өтті.
«Теңізшевройлдың» өз қызметкерлеріне қажетті қолдау көрсетуді көздеген бағдарламалары көп. Солардың қатарында тұрғын үйді несиелеу мен білім гранттарын, фитнес-клуб жарналары және көптеген бонустық бағдарламаларды айтуға болады. Мұның барлығы «Теңізшевройлдың» қызметкерлеріне бәсекеге сай жалақы мен әлеуметтік пакет ұсына алатынын, сонымен бірге, осындай бағдарламалар арқылы өз өндірісіне қажетті ең үздік және жоғары білікті мамандарды жұмысқа тартуды қамтамасыз етуге қабілетті екенін байқатады.
Жолдасбек ШӨПЕҒҰЛ,
«Егемен Қазақстан».
Атырау облысы.
