Дақпырт

Kaspi bank, Банк Центр Кредит және Альянс банктің банкроттығы жайындағы ақпараттар жалған Сейсенбі күні таралған жалған сыбыстардың алдын алу үшін еліміздегі үш бірдей ірі банк –  Kaspi bank, Банк Центр Кредит және Альянс банк құқық қорғау органдарына жүгініп, жалған ақпарат таратушыларды табуға көмектесуін сұрауға мәжбүр болды. Жұртты дүрбелеңге салмақ болған  ақпараттық ша­буыл­дардың авторлары қазірге белгісіз. Ал аталмыш қаржы меке­мелері банкорттыққа ұшы­райды-мыс дейтін sms-хабарлар таратқандардың бұл ісі – теңгенің бағам өзгертуіне қатысты жағ­дайды ушықтырмақшы бол­ғандардың арандату әрекеті екені айдан анық. Қазірге бұл оқиғаның ұзын-ырғасы төмендегідей. Үс­тіміздегі жылдың 11 ақпанында Ұлттық банк теңге бағамының өзгергенін мәлімдегеннен кейін-ақ, интернет желілерінде қазақ­стандық бірнеше ірі банктің банкрот болатындығы жайында жалған ақпараттар таратыла бастаған. Мұндай жалған, яғни «до­малақ» ақпараттармен алдымен Банк Центр Кредит күресуге мәж­бүр болды. Аталмыш банктің жетекшісі осы аралықта жалған ақпаратты жоққа шығару үшін екі рет ашық мәлімдеме жасады. Кесірлі ақпараттар мұнан кейін де сап тыйыла салмады. Ұя­лы телефонның WhatsApp мессенд­жерін пайдаланушылар арасында жалған сыбыс жалғасып, енді «Альянс Банк» пен Kaspi bank-тің жабылуы мүмкіндігі туралы сөз таратылды. Сондықтан да, сейсенбі күні Kaspi bank, Банк Центр Кредит және Альянс банктің банкроттығы жайындағы ақпарат шындыққа сәйкес келмейтіндігі туралы бір­лескен мәлімдеме жасалды. Банк Центр Кредиттің, Kaspi bank пен Альянс банктің бас­шы­лары мен акционерлері жә­не Қазақстан Қаржыгерлер қауым­дастығы аталған ақпараттың аран­датушылық сипатқа ие екенін рес­ми түрде хабарлап отыр, оның жал­ғыз мақсаты – Қазақстанның қар­жы жүйесін тұрақсыздандыру. Kaspi bank, Банк Центр Кредит, Альянс банк және Қазақстан қар­жыгерлері қауымдастығы  аталған ақпарат Қазақстанның қар­жылық жүйесін тұрақсыз ету мақсатында арандатушылық маз­мұнға ие екенін хабарлайды», делінген банктердің мәлім­демесінде. Салымшылары мен клиент­терін сабырға шақырған банктер бұл жалған ақпаратты таратушы­ларды әкімшілік-қылмыстық жауапқа тартқызу үшін құқық қор­­ғау органдарына шағымдануда. Банк Центр Кредит шұғыл түр­де Бостандық аудандық соты­на жалған ақпараттың шын­дық­қа сәйкес келмейтінін растау туралы талап-арыз бермек. Банк бас­шылығы қаңқу сөз тарат­қанд­арды ресми түрде кешірім сұратуды ойластырып отыр. Сол сияқты Kaspi bank бан­крот­тығы жайында жалған ақ­парат таратқан бастамашыны анық­тау үшін аталған банк 100 мил­лион теңге көлемінде сыйақы тағайын­дады. Қысқасы, Банк акцио­нер­ле­рі мен жетекшілері аран­дату­шы­лық іс-қимылдың жай-жап­са­рын анықтап, лаң тудыр­мақ бол­ғандарды заң аясын­да жауап­кер­шілікке тартатын­дық­тарын мә­лім­деуде. Дүрбелең жаса­мақшы  бол­ғандарды жазалауды аяқ­сыз қал­дырмауға Қазақстан Қаржы­герлер қауымдастығы да араласады. Тұрғындарға тұрақты қызмет етіп келе жатқан қазақстандық банктер өз жұмысын жалғастыра беретін болады. Өйткені, атал­ған банктердің барлығы да Мем­ле­кеттік депозиттерге кепілдік беру қорының қатысушылары болып табылады. Айнаш ЕСАЛИ, «Егемен Қазақстан». АЛМАТЫ.