Ұлт руханиятын қаузады

Қазақстанның орталық коммуникациялар қызметінде кезекті брифинг өтті. Бұл жолғы басқосу Елбасы Жолдауында айтылған «Мәңгілік Ел» ұлттық идеясына арналды. Жиынға белгілі суретші Бақтыбек Талқамбаев, «Шежіре» қазіргі заман галереясының жетекшісі Роза Жүсіпова, медицина ғылымдарының докторы Ерболат Дәленов және өнертану профессоры Ермек Асылханов сынды өнер, ғылым саласының өкілдері қатысты. «Зиялы қауым өкілдері Мем­лекет басшысының Жолдауында жарияланған «Қазақстан-2050» Стратегиясын қолдайды. «Мәң­гілік Ел» ұлттық идеясы бізді рухани ізденістерге, шығар­ма­шы­лық ізденістерге ынталанды­рады. Соның дәлелі ретін­де біз елордалық суретші Бақтыбек Тал­қамбаевтың көрме­сін ұйым­дастырып отырмыз. Бұл көрме «Мәңгілік Ел» деп аталады», – деді осы іс-шараға ұйытқы болған Роза Жүсіпова. «Елбасының «Мәңгілік Ел» деген сөзі бізді, өнер адамдарын қанаттандырып жіберді. Менің шығармашылығым да негізінен осы тақырыпқа арнал­ған. Көптеген туындыларымды шетелдік көрермендер жы­лы қабылдап, ұлттық бояуға риза­лықтарын білдіріп жүр. ХХІ ғасыр – Елбасы жиі айтатын ғылым ғасыры. Сол ғылым ғасырының ер­тең­гі тұтқасы – бүгінгі талантты балалар. Олардың арасынан та­лант­тарды тап басып танып, бау­лу біздің басты міндетіміз», деді Бақтыбек Талқамбаев. Брифингте сөз алған медицина ғылымдарының докторы Е.Дәленов «Мәңгілік Ел» болу үшін адам денсаулығының да маңызды екенін айта келе, бұл ретте шығармашылықтың, оның ішінде, әсіресе, сурет өнерінің пайдасы молынан екенін жеткізді. Аталған өнерде болатын жеті түрлі бояудың қасиетіне де тоқталып өтті дәрігер. Ал, өнертану профессоры Ермек Асылханов та бейнелеу, сәулет өнерлерінің ерекшеліктерін өзіндік нақты мысалдарымен толықтыра келе, елімізде сәулет өнері кем дегенде қола дәуірінен басталатынын нақты дәлелдермен тілге тиек етті. Басқосу барысында қонақтар БАҚ өкілдерінің бірқатар сұрақ­тарына жауап берді. Әбдірахман ҚЫДЫРБЕК, «Егемен Қазақстан».