ОТАН ҚОРҒАУ ОТБАСЫНАН БАСТАЛАДЫ

Нұрсұлтан НАЗАРБАЕВ: Үстіміздегі жылы біз Ұлы Отан соғысындағы Жеңістің 65 жылдығын атап өтеміз. Бұл біздің ортақ тарихымыздағы маңызды дата. (Қазақстан халқына Жолдауынан). Мемлекет басшысы – Қарулы Күштердің Жоғарғы Бас қолбасшысы Нұрсұлтан Назарбаев кеше Отан қорғаушылар күні мен Ұлы Жеңістің 65 жылдығы қарсаңында Ильинка кентіндегі әскери қалашық пен астаналық №44813 әскери бөлімде болды. Осындағы коттедж үлгісінде салынған тұрғын үй кешені орналасқан әскери қала­шық алды абыр-сабыр. Сапқа тұрғызылған әскерилер, ойнаған оркестр Елбасын лайық­ты қарсы алу үшін дайындық үстінде. Әске­ри­лердің жүздеріндегі ерекше жылылық олар­дың елге, Елбасына деген риясыз көңіл­дерін паш етіп тұрғандай. Кіреберіс қақ­па­ның маңдайшасына “Президентімізге, хал­қы­мызға мың да бір рахмет!” деп жазы­лып­ты. Елбасы – Жоғарғы Бас қолбасшы келген кезде әскери оркестр ойнап, әскери сап тік түзеліп тұрды. Алдымен Нұрсұлтан Әбішұлы әскери қалашықтың жобасымен танысып, әскери қызметшілер отбасыларының орналасуын сұ­рап білді. Содан кейін әскери қызмет­ші­лерге тұрғын үйлердің кілттерін салтанатты жағдайда табыс етті. Барлық коттедж ішін­ара жиһаздармен қамтамасыз етілген, көлік қоятын орны бар ауласы 10 сотық алаңды құрайды. Әскерилердің алды  желтоқсан айынан бастап осында қоныстаныпты. Сол уа­қыттан бері пайдалануға жан-жақты әзір­ленген 11 баспана кілті кәсіби мерекеге  орай иелерін тапты. Сондай қуаныш иеле­рінің бірі Әскери-әуе күштерінің полковнигі Серік Әбдірайымов бұқаралық ақпарат құралдары өкілдеріне былай деді: “Соңғы кездері ұшақтарымыз бен тікұшақтарымыз күрделі жөндеулерден өтіп, ұшу сағаттары арта бастады. Ұлы Жеңістің 65 жылдығы қар­саңында және Отан қорғаушылар мере­ке­сіне орай пәтерге ие болып, үлкен қуа­ныш­қа кенеліп тұрмыз. Мұның барлығы Елбасының, еліміздің Отан қорғаушыларға деген үлкен қамқорлығының арқасы деп түсінеміз”. Аумағы 40 гектарды құрайтын қалашық­та 200 коттедж болса, соның 129-ы Қор­ға­ныс министрлігіне бөлініпті. Тағы бір белгілі болғанындай, аумағы 10 гектар телімге әкім­шілік корпусы, жатақханасы, асханасы және тұрмысқа қажеттінің барлығы бар кешен салу көзделіп отыр екен. Бір немесе екі әске­ри отбасына арналған коттедждер 176 әскери отбасына есептелініпті. Әзірге 88  әскери отбасы баспаналарына кіріп үлгерген көрінеді. Енді қалғаны шілде айына дейін, яғни жөндеу жұмыстары біткен соң қоныс­танады деп күтілуде екен. Жалпы, тұрғын үйлер үш және одан да көп баласы бар әскери қызметшілерге бе­ріл­гені мәлім болды. Мұнда қыстап шыққан тұр­ғындар қақаған аязда да өз баспана­лары­ның жылы болғандығын айтып жатты. Тұрғын үй әзірге автономды пеш арқылы жылытылады. Шағын да оңтайлы пешке отын ретінде көмір пайдаланылады екен. Болашақта әскери қалашық Астананың орталықтанған жылу жүйесіне қосылады деп жоспарланыпты. Жалпы, Елбасы Қарулы Күштердің дамуына және әскери қызметшілердің тұрмыстық жағдайына үнемі ерекше назар аударып келеді. Жақын маңдағы бір-екі коттедждің ішіне арнайы кіріп, ондағы әскерилердің тұрмыс-жағдайымен жақын танысуға ықылас танытуының өзі осы сөзіміздің дәлелі болса керек. Бұдан кейін Мемлекет басшысы – Қа­ру­лы Күштердің Жоғарғы Бас қолбасшысы Нұрсұлтан Назарбаев, жоғарыда атап көр­сетілгеніндей, елорданың әуе қорғанысын қамтамасыз ететін  №44813 әскери бөліміне атбасын бұрды. Бұл – Жеңістің 65 жылдығы мен Отан қор­ғаушылар  күні қарсаңына орайласты­рыл­ғандықтан, Елбасы бірінші кезекте атал­ған әскери бөлімнің жауынгерлік дайын­дығының деңгейімен танысты. Мәселен, №44813 әскери бөлімінде Нұрсұлтан Әбішұлы зениттік-зымырандық дивизионның шартты әуе нысанын жою үдерістерін тамашалады. Қарулы Күштердің Әуе қорғанысы күштері бас қолбасшысының орынбасары, генерал-майор Оқас Сапаров елорданың әуе күштері қорғаныс жүйесінің артықшылығы мен ерекшелігі жөнінде айтты. Ол, сондай-ақ, әскери бөлімдегі зениттік-зымырандық дивизионның шартты әуе нысанын жою іс-қимылдарына қатысты жан-жақты мәлімет берді. Ал Қарулы Күштердің Әуе қорғанысы күштерінің бас қолбасшысы, генерал-майор Александр Сорокин елорданың әуе қор­ға­ны­сын қамтамасыз ететін зениттік-зымы­ран­дық кешеннің тәжірибелік тұрғыдағы іс-қимылы жөнінде әңгімеледі. Сонымен қатар, Елбасына әуе қарсы­ла­сының түрлі деңгейдегі соққысына тойтарыс беретін көпмақсаттағы зымыранды кешен жауынгерлік есеп тобының іс-қимылдары да жан-жақты таныстырылды. Мемлекет басшысы – Қарулы Күш­тер­дің Жоғарғы Бас қолбасшысы авиацияның арнайы жауынгерлік тапсырмалардан кейінгі ұшып келу шараларын бағалады. Мәселен, әуе шеруінде армиялық авиацияның Ми-17 тікұшағы, екінші буындағы қос Су-27 ұша­ғы, сондай-ақ, екі МиГ-31 жойғыш ұшағы сап түзеді. Елбасы әуе қорғаушыларының тәжіри­бе­лік сабақтары аяқталысымен жауын­гер­лер­дің арнайы тігілген шатырлы қалашы­ғын­да әскери бөлімнің жеке құрамымен кездесіп, олардың тыныс-тіршілігімен танысты, дала асханасынан дәм татты. Асқар ТҰРАПБАЙҰЛЫ, Ләйла ЕДІЛҚЫЗЫ.