Аймақтар • 02 Қараша, 2021

Алматыда Нұртас Оңдасыновтың ескерткіші ашылды

Алматыда мемлекет және қоғам қайраткері, ғалым-лингвист Нұртас Оңдасыновтың ескерткіш-бюсті ашылды, деп хабарлайды Egemen.kz.

Гауһар ҚАПАШ

Ескерткіш-бюстің ашылу рәсіміне Алматы қаласының әкімі Бақытжан Сағынтаев қатысты.

«Еліміздің тарихында өшпестей із қалдырған Нұртас Дәндібайұлы көптеген игілікті істердің басы-қасында болып, сонау қиын заманда ұлт мүддесі үшін батыл қадамдарға бара алған ұлы тұлға. Қандай жоғары лауазымды қызметте жүрсе де ел тәуелсіздігін, халықтың өз байлығын өзі игеру ісін, ұмытылуға айналған ана тіліміз бен салт-дәстүрімізді қайта тірілту мәселелерін бәрінен де жоғары қойды. Ұлы Отан соғысы мен онан кейінгі ең ауыр жылдарда Қазақстан Үкіметін басқарды. Республикамыздың әлеуметтік-экономикалық дамуына, мәдениеті мен өнерінің, ғылымы мен білімінің өркендеуіне барынша күш салды. Нұртас Оңдасыновтың өнегелі өмірі мен халқына жасаған қалтқысыз қызметін насихаттау, жас ұрпақтың санасына сіңіру – біздің абыройлы міндетіміз», деді қала әкімі құттықтау сөзінде.

Нұртас Оңдасынов соғыс жылдары Республикамызда Ғылым Академиясының дербес шаңырақ көтеруіне, Қазақ Мемлекеттік Қыздар Педагогикалық институты мен Ұлттық Консерваторияның ашылуына, Шет тілдері, Дене тәрбиесі иституттарының және барлық облыс орталықтарында мұғалімдер даярлайтын жоғары оқу орындарының құрылуына бірден бір ұйытқы болған.

Сонымен қатар Нұртас Дәндібайұлы еліміздегі ірі құрылыстардың – Ертіс-Қарағанды, Арыс-Түркістан, Мырзашөл каналдарының, Атырау, Теміртау, Жезқазған, Балқаш, Ақтөбе қалаларындағы ірі зауыттардың, Мойынты-Шу темір жолының салынуына тікелей басшылық еткен тұлға.

Күннің маңызды және өзекті жаңалықтарын «Егемен Қазақстан» телеграм каналынан оқыңыз