Оның қандай мәнісі бар деген сауалымызға аталған департаменттің Азаматтық қорғаныс басқармасының бастығы, подполковник Марат Мұратов бұл министрліктің бұйрығы бойынша болып жатқан ойындар екенін жеткізді. «Министрлік азаматтық қорғаныстың күштері мен құралдарының «Байқоңыр» ғарыш айлағынан ұшырылған зымырандардың құлау мүмкіндігінен болатын апатты жағдайға қарсы іс-әрекеттерге дайын болу керектігі жөнінде берілген бұйрығына сәйкес осы ойындар Есіл ауданында ұйымдастырылып отыр», деді ол.
Аталған жаттығу ойындары 28-29 қазан аралығында өткізілді. Оған 84 адамдық жеке құрам мен 43 дана техника қатыстырылып, «Протон-М» зымыраны құлап, улы заттардың жақын маңдағы Покровка ауылына таралуы мүмкін болған жағдайдағы әрекеттер айқындалып, қарсы шаралардың қандай болуы керектігі пысықталды.
Осы ауылда облыстық маңызы бар ауыл шаруашылығы колледжі бар еді. Жаттығу кезіндегі эвакуациялық пункт соның аумағында орналастырылды. Химиялық уланғыш заттармен жарақаттануы мүмкін адамдар осында жиналатын болды. Эвакуацияланғандарды қабылдайтын комиссия да осында орналастырылды және уланған адамдарға алғашқы көмек те осында жасалатын болып белгіленді.
Жаттығу ойындарының басты мақсаты – төтенше жағдайды құрықтау жұмыстарының толықтығы мен сапасын анықтау, сонымен қатар эвакуациялық комиссияның халықты дер кезінде құлақтандырып, құтқару жұмыстарын жедел ұйымдастыра алу мүмкіндігін сараптау және жарылыстың зардаптарын жою.
Бетін аулақ қылсын, зымыранның құлау мүмкіндігі енді Солтүстік Қазақстанның да аумағын қамтуы мүмкін екені анықталған. Осыған дейін де алты ауданның аумағында осы тәріздес оқу-жаттығу шаралары өткізілген. Оған 112 құрылым мен 785 адамдық 250 техникалық күш қатыстырылған. Сөйтіп, айдың-күннің аманында басымызға зымыран құлауы мүмкін екендігін біліп, облыс халқы алаңдаушылық білдіріп отыр. Қазір бізге ешқандай пайдасы жоқ зымыранның ұшу траекториясы Солтүстік Қазақстан арқылы өтетін болыпты. Зымыран құлайтын болса, оның зардаптары бейбіт тұрғындарға аз болмасы белгілі.
Солтүстік Қазақстан облысы
