Үкімет • 05 Қараша, 2021

Мәжілісте Салық кодексіне енгізілетін түзетулер қаралады

Палата Спикері Нұрлан Нығматулиннің төрағалығымен Мәжіліс Бюросының отырысы өтіп, онда депутаттардың алдағы жалпы отырысының күн тәртібінің жобасы әзірленді, деп хабарлайды Egemen.kz.

Ботакөз БАҚБЕРГЕН

Мәжіліс Спикері Нұрлан Нығматулин атап өткендей, Палата депутаттары бірінші оқылымда Салық кодексіне заңнамалық түзетулер мен оны қолданысқа енгізу туралы заңды талқылауы тиіс.

Парламентарийлер әзірлеген заң жобасында, атап айтқанда, камералдық бақылау нәтижелері бойынша салық дауларын реттеудің міндетті сотқа дейінгі тәртібін енгізу ұсынылады, бұл азаматтардың сот талқылаулары шеңберіне тартылуын төмендетуге мүмкіндік береді.

Мәжіліс бірінші оқылымда құқық қорғау органдары, прокуратура мен сот арасындағы өкілеттіктер мен жауапкершілік аймақтарының аражігін ажырата отырып, үш буынды модельді енгізу мәселелері бойынша заңнамалық түзетулерді қарайды.

Палатаның алдағы жалпы отырысының күн тәртібінің жобасына бірқатар ратификациялық заң жобаларын талқылау да енгізілді. Бұл Қазақстанның Қырғызстанмен және Тәжікстанмен өтеусіз әскери-техникалық көмек көрсету туралы, сондай-ақ Тәжікстанмен тәжік-ауған шекарасының іргелес аудандарында қауіпсіздікті қамтамасыз етуде әскери-техникалық жәрдем көрсету туралы келісімдері.

Депутаттар адам құқықтары жөніндегі уәкілге және оның қызметіне қатысты заң жобаларын екінші оқылымда қарайды.

Бұдан басқа, өлім жазасы мәселелері бойынша Қылмыстық кодекске түзетулерді екінші оқылымда қарау жоспарланған.

Күннің маңызды және өзекті жаңалықтарын «Егемен Қазақстан» телеграм каналынан оқыңыз