Жұма күнгі дауыс беру нәтижесінде құжатты 228 депутат қолдаса, 206-ы қарсы болған. Сөйтіп, президент Джо Байденнің талайдан бері айтып келген жоспары жүзеге асты. Бұл – демократтардың үлкен жеңісі.
Байден әкімшілігі енді Американың автомобиль жолдарын, теміржолдарын және басқа да көлік инфрақұрылымын жаңартпақ. Ақ үй басшысы жаңа жұмыс орындарын құруға және АҚШ-тың бәсекеге қабілеттілігін арттыруға уәде берген еді.
Әйтсе де, демократтар Байденнің ішкі бағдарламасының екінші бағыты бойынша әлі көп жұмыс істеуі керек. Атап айтқанда, әлеуметтік қауіпсіздік желісін кеңейту және климаттың өзгеруімен күресу бағдарламаларын Конгресте қабылдауға күш салуы тиіс. Бағасы 1,75 триллион долларды құрайтын бұл құжат АҚШ қауіпсіздік желісін 1960 жылдардан кейін қайта жаңартатын еді.
Демократтар бұл құжатты да жұма күні талқылауға шығаруға тиіс-тұғын. Бірақ оның құнына қатысты сұрақтар туындағандықтан, заң жобасын кейінге қалдырды. Бұл мәселенің анық-қанығын нақтылауға бірнеше апта кетеді.
Ал инфрақұрылымға қатысты құжаттың қабылданғаны Байденнің абыройын өсіретіні анық. Конгресс отырысынан кейін Ақ үй басшысы арнайы мәлімдеме жасап, іске кірісетін сәт келгенін жеткізді.
Біріккен металлургиялық кәсіподақ заң жобасының қабылдануын құптады. «Өкілдер палатасы елдің маңызды инфрақұрылымын жаңартуға шамамен 1 триллион доллар бөлетін Infrastructure Bill заңын қабылдады. Бұл біз үшін үлкен мәміле, өйткені болат өңдеушілер Американы қамтамасыз етеді!» деп жазды одақ туиттердегі парақшасында.
