«Астана» мен «Қайрат» арасындағы кездесуді тамашалауға келген жанкүйерлердің бірінші таймда іштері әбден пысқаны анық. Өйткені жарты сағаттан аса екі команда тек аңдасумен уақыт өткізді. Ешқайсысы ойын тізгінін қолға алуға асыққан жоқ. Тек алаң иелерінің қорғаушысы Антонио Рукавинаның тепкен добы маңдайшаға тигеннен кейін барып қана бәсеке қыза түсті. Бірінші таймға төреші бес минут қосқанымен, ойын одан да ұзаққа созылды. Сол сәтте Раде Дугалич есеп ашып үлгерді. Үзілістен кейін қонақтар тағы екі гол соқты. 67-минутта Хосе Канте, 72-минутта Артур Шушенчаев нысананы дәл көздеді. Сөйтіп, бұл матч 3:0 есебімен «Қайраттың» жеңісімен аяқталды.
«Шахтер» мен «Тобыл» арасындағы бәсекеде де ірі есеп тіркелді – 5:2. Қарағандылықтар сапынан Идрис Умаев дубльдің авторы атанса, Давид Атанаскоски, Дэвид Мавутор және Айдос Тәттібаев бір реттен мергендік танытты. Қостанайлықтар арасынан Асхат Тағыберген мен Игорь Сергеев гол соқты.
