Шақалақтың өзін дәрігерлер 31 апталық кезінде кесарь тілігімен ота жасау арқылы алған. Өйткені анасының бойындағы жаман індет тым қатты асқынып кеткен екен.
Солтүстік Қазақстан облыстық денсаулық сақтау басқармасы баспасөз қызметінің хабарлауына қарағанда, қазір өкілетті органдар адам өліміне байланысты сараптама жүргізуде. Өлімнің себебі – жоғарыда айтқанымыздай Covid-19-дың кесірінен өкпенің жаппай қабынуы.
«Дәрігерлер аяғы ауыр әйелге емдік-диагностикалық шаралардың бәрін толығымен жасады. Ем-домның бәрі көпбейінді аурухананың жан сақтау бөлімінде жасалды, алайда тиісті нәтиже бермеді. Оның үстіне жас ана жаман індетке қарсы вакцина да қабылдамаған екен», дейді облыстық денсаулық сақтау басқармасының баспасөз хатшысы Гүлнәр Қалиева.
Сөйтіп, жаман індет тағы бір жас өмірді қыршыннан жалмады. Адамдардың оған қарсы күресі – әзірге тек вакцина салдыру екендігін ұмытпаған жөн. Бұл тым болмаса аурудың қатты өршуіне немесе ауырып қалған күннің өзінде тезірек жазылуға себепші болып жатқаны жиі айтылуда. Бүгінде Солтүстік Қазақстан облысында 646 әйел аталған сырқаттан емделуде, оның ішінде аяғы ауыр әйелдер де бар.
ПЕТРОПАВЛ
