Баспасөз конференциясы барысында спикерлер «Пандемиядан кейінгі жаңа әлем» тақырыбына арналған үш күнге созылған «Астана клубының» отырысы жөнінде кеңінен әңгімеледі әрі Әлемдік экономика және саясат институт (ӘЭСИ) және Нұрсұлтан Назарбаев Қоры ұйымдастырған ауқымды іс-шара өз деңгейінде ұйымдастырылғанын жеткізді.
ӘЭСИ директоры Ержан Салтыбаевтың айтуынша, үш күндік іс-шараға 50-ден астам беделді әлемдік спикер, соның ішінде мемлекеттер және үкіметтердің бұрынғы басшылары, халықаралық ұйымдар мен орталықтардың жетекшілері, сондай-ақ ірі халықаралық БАҚ өкілдері қатысты. Клуб отырысы аралас форматта – онлайн және офлайн өтті. «Астана клубының» кейбір сессиялары дәстүр бойынша Chatham house ережесіне сәйкес, яғни жабық форматта өтті.
Брифингте айтылғандай, бір жыл үзілістен кейін өткізілген отырыс бағдарламасында 13 кездесу болды. Тақырыптар бойынша жаһандық экономика, геосаясат және халықаралық қатынастар, климаттың өзгеруі және ядролық қауіпсіздік мәселелері қозғалды. Атап айтқанда, жиында «Коронавирус пандемиясы: қауіп жағдайында қалпына келу, Covid-19 жаңа мутациялары мен бөлінген әлем үшін салдарлары», «Ұлттық мүдделер дәуірі: ұжымдық қауіпсіздік жүйесінің реконфигурациясы», «Жасыл трансформация және жаңа климаттық күн тәртібінің дамушы елдерге тигізетін әсері», «Әлемдік экономикадағы теңсіздіктер: дамушы елдер алдындағы сын қатерлер, «Ұлы бөлініс: жаһанданудың жаңа архитектурасы қандай болады?», «АҚШ-Қытай текетіресі: әлем экономикасы мен геосаясатына әсерлері», «Батыс vs Ресей: Еуразиялық экономикалық одақ үшін салдарлары», «Ауғанстан болашағы және оның Орталық Азия аймағына әсерлері», «Иран мен Таяу Шығыс: ядролық мәміле және аймақ перспективасы», «Жаңа әлемдік тәртіп немесе технологиялық үстемдік үшін талас» тақырыптары әңгіме арқауы болды.
Сондай-ақ «Астана клубы» алаңында Тәуелсіздіктің 30 жылдығына орайластырылған «Тәуелсіздіктің 30 жылдығы: Назарбаев стратегиясы және Қазақстан мен Орталық Азияның болашағы» тақырыбындағы талқылауда ел дамуының тәжірибесіне, сондай-ақ ішкі және сыртқы саясатын қалыптастырудағы Тұңғыш Президенттің рөліне кешенді баға берілді.
Ядролық қауіпсіздік үшін Жаһандық Көшбасшылар Альянсының кездесуі аясында ядролық қауіпсіздік мәселесіне ерекше назар аударылды. «Түн ортасы аяқ басты: ядролық диалог уақыты» сессиясы барысында спикерлер жаһандық стратегиялық тұрақтылық саласындағы дағдарыс жағдайы және альянс жұмысының алдағы бағыттарын талқылады.
Көшбасшылардың жаһандық Альянсы Қазақстанның Тұңғыш Президенті Нұрсұлтан Назарбаевтың бастамасымен 2019 жылы «Астана клубының» бесінші отырысының қорытындысы бойынша құрылды.
«Астана клубының» жұмысы Қазақстан Республикасының Тұңғыш Президенті – Елбасы Нұрсұлтан Назарбаевтың қатысуымен өткен «Үлкен Еуразия: болашақ әлем көрінісі» пленарлық отырысымен аяқталды.
