Бұған дейін Омарованың сайлануына үзілді-кесілді қарсы болған сенатор Пэт Туми бұл жолы да алған бетінен қайтқан жоқ, ол кандидаттың өткен өміріне қатысты жағымсыз мәліметтер жариялады.
Оның айтуынша, Омарованың идеясы социалистік көзқарасты бейнелейді.
«Осындай көзқарасы бар адамды Американың ұлттық және басты реттеуші банкін басқаруға тағайындау алаңдауға және қорқуға тұрарлық жағдай», деді ол.
Огайо штатының демократы Шеррод Браун республикашыларға Омарованың КСРО-да өскенін айтып, ақпараттық шабуыл жасаған.
Тыңдау барысында Луизиана штатының сенаторы Джон Кеннеди: «Сізді не профессор, не жолдас деп атарымды білмеймін», деді. Осылайша ол Омарованың КСРО-да туып-өскенін, комсомол қатарында болғанын меңзеді.
«Мен Кеңес Одағында туып-өстім. Онда барлық адам осы ұйымның мүшесі болды. Бұл мектептегі қалыпты жағдай», деп қысқа жауап берді Сәуле Омарова.
Сонымен қатар Кеннеди Омарованың аталған ұйымнан ресми түрде шыққанына қызығушылық танытып, Омарованы кандидатурадан жазбаша түрде бас тартуын талап ете бастағанда, Шеррод Браун: «Ол кеңес азаматтығынан бас тартты», ˗ деді.
«Мен коммунист емеспін. Бұ идеологияны қолдамаймын. Мен ешқашан өзімді осындай топқа жатқызған емеспін және марксистік немесе коммунистік пікірталастарға қатысқан жоқпын», деп жауап берді. Сөзінің соңында: «Мен бұл елге келдім. Америкалық болғанымды мақтан етемін», деді Қазақстан тумасы.
Еске салайық, кеше америкалық БАҚ-тар Сәуле Омарованың 1995 жылы Висконсин штатында ұрлық жасағанын жарыса жазған болатын. Ол кезде 28 жаста болған әйел 214 доллар тұратын тауарды қолды қылған. Оның ішінде төрт жұп аяқ киім, екі бөтелке әтір су, екі белбеу және шұлық бар.
