Жиналған жұрттың айрықша көңілінен шыққаны «Қошқар көтеру» сайысы болды. Күш-қуаттары тасыған мықтылар бәсекесінде қошқарды иыққа салып 101 мәрте көтерген Бауыржан Әбдіқайым жеңімпаз атанса, Евгений Ким екінші орынды иеленді. Үшінші сатыға Нұрболат Ертас жайғасты. Кір тасын көтерген білекті жігіттер де көпшілікті тамсандырды. Зіл батпан тасты 81 рет әуелеткен Еркін Ерімбетов бас бәйгені қанжығасына байласа, Ақжол Жолдасбаев (80 рет) пен Урматбек Ибрагимов (60 рет) күміс пен қола медальды еншіледі.
Арқан тарту сайысында Төле би мешітінің командасына тең келер ешкім табылмады. Финалда олар Абай мешітінің серкелерін сан соқтырса, әл-Мұхамед мешітінің жамағаты үшінші сатыға тұрақтады. Допты қақпаға тебуде Жандос Тұрысбек мергендік танытса, құрамында Азамат Дүйсенбай, Бекзат Рижанов және Саят Мұхаметкәрім өнер көрсеткен «Нұр-Мүбәрак» командасы петанк сайысында жеңіске жетті. Ұлттық ойын – асық атуда Раис Жеңісұлы жеңімпаз деп танылды. Ал білекті жігіттердің бәсекесі – армрестлингте Төле би мешітінің намысын қорғаған Абзал Тілеубаевтың тегеурініне ешкім шыдай алмады. Жарыс аяқталған бетте жеңімпаз және жүлдегер атанған жігіттер бағалы сыйлықтармен марапатталды.
– Жамағат арасындағы жарыстарға көпшіліктің ықыласы жыл санап артып келеді. Биыл футбол, волейбол және мереке күндеріне орайластырылған түрлі спартакиадалар өткіздік. Қатысушылардың да, көрермендердің де қарасы мол болды. Аталған іс-шараның негізгі мақсаты – мешіт жамағаты арасында дене шынықтыру мен спортты және саламатты өмір салтын насихаттау, сонымен қатар исламның дәстүрлі емес ағымының жетегінде жүрген жандарға асыл діннің оң жолын көрсету. Осындай спорттық сайыстар арқылы елдің рухы көтеріліп, мешіт жамағатының бірлігі нығая түссе деген тілек бар, – дейді жарысты ұйымдастырушы Әлия Шайхан.
