Бизнес • 24 Қараша, 2021

Бизнес-форумның берері мол

73 рет көрсетілді

Күні кеше Шымкентте YPO Forum Shymkent үшінші бизнес-форумы өтті. Жаңа жағдайдағы бизнес мүмкіндіктерін қарастыруға арналған форумға қала әкімі Мұрат Әйтенов және Қазақстанның бірқатар беделді бизнес өкілдері мен жергілікті кәсіпкерлер қатысты. Форумда қала басшысы отандық бизнесті дамытуда бүгінгі іскерлік жиынның маңызы жоғары екенін атап өтті.

– Мемлекет басшысы кәсіп­керлерді қолдау және қорғау ел дамуы үшін маңызды міндет еке­нін айтты. Отандық бизнесті дамыту, жаңа жағдайдағы іскерлік мүмкіндіктерді ілгерілету бойынша бүгінгі форум жемісті болады деген сенімдемін. Мемлекеттік қолдаулардың нәтижесінде елі­мізде оңтайлы бизнес климат қа­лып­тасты. Қазақстандық бизнес ашық және мобильді бола түсті. Кәсіпкерлеріміз үшін жаңа мүмкіндіктер ашылды. Біз ин­весторлар үшін қолайлы бизнес климат қалыптастыру жұмыста­рын жалғастыратын боламыз, – деді М.Әйтенов.

Ол 2018 жылы республикалық қала мәртебесін иемденген Шым­кент қаласының өнеркәсіп көле­мі 411 млрд теңгеден биыл 711,5 млрд теңгеге жететінін атап өтті. Қа­лаға осы уақыт ішінде 2,6 трлн теңге инвестиция тартылып, 200-ден аса жаңа кәсіпорын ашылып, жұмыс орындарының саны 20 мыңнан асқан. Шағын және орта бизнес саласында 87 мыңнан астам кәсіпкерлік субъекті тір­келіп, жалпы өңірлік өнімдегі үлесі 41,6%-ға жетті.

Форум мінберінде Chocofamily интернет-холдингінің негізін ­қа­лау­шы және осы ұйымның ­Ба­­қы­­лаушылар кеңесінің төр­аға­­сы Ра­миль Мухоряпов, Tan Media то­­бы­ның құрылтайшысы, «31 арна» телерадиокомпания­сы мен бірқатар тәуелсіз бұқа­ра­лық ақпарат құралының же­тек­­шісі Арманжан Байтасов, Bilim Media тобының құрыл­тай­шысы әрі жетекшісі Рауан Кенжеханұлы, Freedom Holding Corp компаниясының Бас атқа­рушы директоры және Дирек­тор­лар кеңесінің төрағасы Ти­мур Турлов, Alageum Electric компаниялар тобының құрыл­тайшысы Еркебұлан Ильясов, BI Group құрылыс компаниясының негізін қалаушы, компанияның Директорлар кеңесінің төрағасы Айдын Рахымбаевтар сөз сөйлеп, тәжірибесімен бөлісті және дәріс­тер өтті.

«Таң медиа тобының» иесі, «31 арна» телерадиокомпаниясының, сондай-ақ Қазақстандағы басқа да тәуелсіз БАҚ-тың негізін қа­лау­шы Арманжан Байтасов БАҚ құру мен оны жүргізудің қыр-сырымен бөлісті. Оның пікірін­ше, бұл бизнестің тартым­ды жә­не қолжетімді бағыты, өйт­ке­ні тұтынушылардың негізгі инс­тинк­­терінің бірі – жаңа білім алу.

– Қазір бәрі өте тез жүріп жатыр, соның ішінде әлеуметтік желі­лердің дамуының нәтижесінде айтарлықтай материалдық инвес­ти­цияларды қажет етпейді. Ең ­бастысы, тартымды контент жа­сау және жеке брендті дамыту, дей­ді Арманжан Байтасов.

Bilim Media Group-тың негізін қалаушы әрі басшысы Рауан Кен­жеханұлы адам капиталына инвес­тиция салу экономиканың дамуы үшін іргелі екенін атап өтті.

Ал Freedom Holding Corp ашық компаниясының Бас атқарушы ди­ректоры және Директорлар кеңе­сінің мүшесі Тимур Турлов за­манауи бизнестің негізгі мүм­кіндіктері мен қауіптерін атады. Негізгі факторлардың арасын­да халықаралық бәсекелестік пен әлем­нің өзгеріп жатқан керемет жыл­дамдығы анықталды.

Жоғары табысты бизнес құ­ру үшін ондаған жылдар және мың­даған қызметкер қажет емес.

– Бүгінде көптеген өнім клиен­т­­ке қолжетімді және бүкіл әлем­­­де ұсынылады. Мысалы, сіз өз бизнесіңізді 20 жыл бойы құр­­дыңыз делік. Осы себепті де сіз бәсе­келестеріңізге өзіңіздікіндей бизнес құруға 20 жыл уақыт кетеді деп ойлайсыз. Бірақ бұл олай емес. Шағын стартаптар тез өседі. Ал басқа ойыншылар қатты қобалжуы керек, – деді спикер.

Сондай-ақ ол қаржы өнім­де­рін цифрландырудың артықшы­лық­тарына тоқталды, оның ішінде еліміз үшін бірегей жаңа механизм – цифрлы ипотека, сол арқылы санаулы минуттарда жылжымай­тын мүліктің иесі бола аласыз – бұл бұрын-соңды болмаған жоба.

Alageum Electric компания­лар тобының иесі Еркебұлан Ілиясов өз баяндамасын табыс­ты бизнестің қыр-сырына арнады. Кез келген кәсіпкер назар ауда­руы тиіс негізгі факторлар – әр­та­раптандыру, экспорттау, жоба­ларды басқару орталығын құру, цифрландыру, маркетингке инвестиция құю және оқыту қажеттілігі.

Қазақстандағы ең ірі құрылыс компаниясы BI Group дирек­тор­лар кеңесінің төрағасы Айдын Рахымбаевтың баяндама­сы жұрт­шылықтың үлкен қызығу­шы­лығын тудырды. Бизнесмен империя құрудың жолын ғана емес, сонымен қатар кәсіби мамандар­дан жоғары тиімді команда құру­дың жолын айтты. Холдинг қа­зіргі уақытта еліміздегі жетекші құрылыс салушы болып табылады, ТМД-дағы ең ірі құрылыс салушылар рейтингінде екінші және әлемдегі барлық құрылыс компаниялары арасында 180-орында.

– Біз өз жұмысымызды 100 мың доллар капиталмен бастап, 1,5 млрд доллар тауар айналымына шықтық. Қазір бір мезгілде 186 жобаны жүзеге асырып жатырмыз. Біздің жоспарымыз – алдағы 5 жылда жұмыс көлемін 3 есеге арттыру. Бизнестегі табыстың сы­ры – көп жұмыс істеу, көп оқу, өсу нүктелерін іздеу және осы­ның төңірегінде корпоративтік мәде­ниетті қалыптастыру, тиімді команда құру, – деді А.Рахымбаев.

Ол пандемия тұсында бизнесті сақтап қалу және оны әрі қарай дамыту үшін бірінші басшылардың жалақысын 40 пайызға, екінші басшылардың жалақысын 20 па­йыз­ға қысқарту туралы шешім қа­былдапты. Бірақ қатардағы қыз­меткерлердің жалақысы қыс­қар­ған жоқ.

Қысқаша айтқанда, YPO-ға елі­міздің ең озық бизнесмен­де­рін тарту – форумды ұйымдас­ты­рушылардың алға қойған мақ­саты және бұл сәтті болды. Іс-шара мен ұйымға кіру мүмкіндігі қазақ­стандық кәсіпкерлердің үлкен қызы­ғушылығын тудырды. Алдағы уақытта Қазақстан­да қызықты бизнес-жобалар кө­бейетіні сөзсіз.

Сонымен қатар «Көрме» орта­лығында жергілікті тауар өнді­рушілер шығаратын өнім түр­лерінің көрмесі өтті. Қала эко­но­микасының тірегі саналатын 100-ге жуық кәсіпорын «Шымкент өнім­дері» тақырыбымен алдағы үш күн көлемінде жалғасатын көрмеге өз тауарларын ұсынды.

Жалпы, тәуелсіздік жылда­рын­да Шымкент қаласының экономикасы түрленді. Қаламызда құрылыс индустриясы, машина жасау, мұнай-химия, жеңіл өнер­кәсіп, тамақ өндірісі, текстиль өнер­кәсібі, фармацевтика, ауыл ша­руа­шылығы өнімдерін терең өң­деу, тағы басқа өндірістік салалар қа­лыптасты. Көрменің ашылу рә­сіміне қала әкімі Мұрат Әйтенов қа­тысып, қала кәсіпорындары шы­ға­ратын өнім түрлерімен танысты.

– Мемлекет басшысы биыл­ғы Жолдауында экономиканы әрта­рап­тандыру, өндірілетін тауар­лардың түрін көбейтіп, экспорт географиясын кеңейту жө­нінде нақты тапсырмалар берді. Өң­деу өнеркәсібінің экспортын кө­бейту, еңбек өнімділігін арттыру нәтижесінде қаламыздың өнер­кәсіп көлемі жыл аяғына дейін 711,5 млрд теңгеге жетеді, өн­­дірілген өнімнің 87 пайызын өңдеу өнеркәсібі құрайды. Қаладағы 4 өндірістік аймақта 118 жоба жүзеге асып, 21 мыңға жуық жұмыс орындары ашылды. Биылдың өзінде жаңадан 5 жоба жүзеге асып, 203 жұмыс орны ашылды», деп атап өтті шаһар бас­шысы.

Шымкент қаласы отандық на­рықта жекелеген өнімдердің не­гіз­гі жеткізушісі болып санала­ды. Цемент өндірісі, мотор май­ла­ры, кілем, аяқкиім, тұрмыс­тық бұйымдар өнімдері, фарма­цевтика, азық-түлік өндірісі жө­нінен ішкі нарық пен отандық экспорттық әлеуетті арттыруда. Жеңіл өнеркәсіп саласындағы кәсіпорындар отандық нарықтың 21 пайызын қамтуда.

Қала экономикасын әр­тарап­тандыру, ауылшаруашылық өнім­дерін терең өңдеу кәсіпорын­да­рының үлесін арттыру, шағын және орта кәсіпкерлікті дамыту бойынша кешенді жұмыстар қолға алынып, нәтижесін беруде.

Шымкенттік өнімдер көрмесі санитарлық талаптар сақтала отырып өткізілді. Оған қатысушылар Ashyq жүйесі арқылы тіркеліп, мәртебесі айқындалды.

Шымкентте шығатын өнімдер көрмесі алдағы уақытта тұрақты түрде өтетін таныстырылымдық сипаттағы алаң ретінде қызметін жалғастырады. Оның аясында дайын өнімдерді өткізу нарығын қарасты­ру, экспортқа бейімдел­ген тауар түрлерін ілгерілетуге мүмкіндіктер ашу, шығарылған өнімдердің СТ-KZ отандық сапа стандарты талаптарына сай болуын ұйымдастыру, іскерлік байланыстарды арттыру міндеттері бойынша жұмыстар жүргізіледі.

Соңғы жаңалықтар

2186 адам коронавирустан жазылып шықты

Коронавирус • Бүгін, 09:30

Елорда «жасыл» аймаққа өтті

Коронавирус • Бүгін, 09:13

1/16 финалға шыға алмады

Теннис • Бүгін, 08:45

«Реал» – Суперкубок иегері

Футбол • Бүгін, 08:40

Андеркардта күш сынасады

Спорт • Бүгін, 08:37

«Алтын тай» Аягөздің еншісінде

Аймақтар • Бүгін, 08:32

Ұқсас жаңалықтар