Қазақ ұлттық хореография академиясы Temps lié II кәсіби хореографиялық оқу орындарының халықаралық фестивалін көрнекті балетмейстер Мариус Петипаның «Кішкентай жауһар» аталған спектаклімен ашуының маңызы ерекше. Аталған академияның ректоры Алтынай Асылмұратова әлемдік деңгейдегі балеттің ерекшелігіне тоқтала келіп: «Мариус Петипаның осы соңғы туындысы үлкен театрлар сахнасында қойылмаған, бірақ ол туралы естелік сақталған. Міне, ғасырдан астам уақыт өткен соң көптеген талантты адамның күш-жігерінің арқасында біз осы спектакльді қайта жаңғыртып, көрермен қауымға сыйға тартып отырмыз», деп атап өтті.
Балет либреттосын хореограф Василий Медведев пен Яна Темиз − Иван Всеволожскийдің түпнұсқалық либреттосы негізінде қайта жасаған. Балет хореографиясы іс жүзінде жоғалып кеткендіктен, оны талантты хореограф Василий Медведев елімізде сахналау үшін қайта әзірледі. Оркестр партитурасының авторы, музыкант әрі музыкалық өңдеуші Дәулет Шәкіров. Қойылымға арналған костюмдерді Император театрларының директоры Иван Всеволожскийдің эскиздері негізінде суретші Наталья Протасова дайындаса, сценография авторы Жандос Омаров.
«Бұл балетте мен классикалық бидің барлық түрлерін көрсетуге күш салдым, атап айтсам, үлкен ансамбльдер, па-де-сиз, па-де-катр, па-де-труа, адажио, вариациялар. Мен балеттің әдемі, серпінді және заманауи болып шығуын қаладым. Петипаның да жүз жылдан астам уақыт бұрын жасалған кез келген балетті қоюы да екіталай еді. Өнер дамып келеді, бұл жанды және үздіксіз процесс» дейді қоюшы-хореограф Василий Медведев.
Ал әртістермен бірлесіп жұмыс жүргізген, қоюшы-хореографтың ассистенті Станислав Фечоның сөзіне зер салсақ, ол ұмытылған балеттерді қалпына келтіру – хореограф үшін үлкен тәжірибе екендігін айтады.
«Раушан гүлі мен көбелектің романы» − бұл ұлы хореографтың шығармашылық мұрасын сақтаудың, оны неоклассикалық рухта қайта ойластырудың үлгісі деймін. Сондықтан оны әлемдік балет өнерінің дамуына қосқан үлес деп білемін. Дәлірек айтқанда, Қазақ ұлттық хореография академиясының оқушылары және талантты жас орындаушылармен жұмыс – ескілік пен жастық шақтың ғана емес, балет өнерінің өткені мен болашағының символдық үйлесімі болды» деді ол.
Өнерсүйер қауымды қуанышқа бөлеген қойылымға Қазақ ұлттық хореография академиясының ұстаздары мен оқушылары қатысып, ондағы басты партияларды – Камила Шахманова, Хван Амир, Амина Кисембаева, Лимара Айдарова және Алина Зырянова шебер орындады. Қысқасы, эмоциялық әсерге толы тамаша орындау техникасы жас балет әртістеріне сахнада ұмытылмас бейнелер жасауға мүмкіндік берді.
