Қазақстан «А» тобында

Жақында 2016 жылы Францияда өтетін Еуропа чемпионаты іріктеу турнирінің жеребе тарту рәсімі өтті.  Онда 53 елдің ұлттық құрамасы 9 топқа бөлініп, қар­сыластарын анықтады. Жеребенің қорытындысы бойынша 8 топта 6 құрама, 1 топта 5 елдің командасы өнер көрсететіні белгілі болды. Енді іріктеудің жаңа шарты бойынша  әр топтан алғашқы екі орынды алған құрама тікелей Еуро додасына жолдама алады. Сондай-ақ, өз топтарында үшінші орынды иеленіп, жоғары ұпай алған командалар да  Еуропа чемпионатына қатысу мүмкіндігіне ие болады. Ал қалған үшінші орын иеленген 8 ел өзара мықтыны анықтайды. Жалпы, Еуро жарысына 24 елдің ұлттық құрамасы қатысады. Ескерте кететін нәрсе, Франция алаң иесі ретінде іріктеуге қатыспайды. Біздің ел «А» тобында Голландия, Исландия, Латвия, Түркия, Чехия командаларымен ойнайды. «Егемен-ақпарат».