Елордадағы Бейбітшілік және келісім сарайында суретшілеріміздің таңдамалы туындыларынан тұратын бес томдық «Қазақ өнері» атты кітабының тұсаукесері мен бейнелеу өнері шеберлерінің шығармашылық көрмесі өтті.
«Қазақстан Суретшілер одағының 80 жылдық мерейтойы аталып өткен болатын. Соған байланысты мәдени іс-шаралар бағдарламасы аясында «Қазақ өнері» атты жинақты шығарған едік. Бұл кітап бес томнан тұрады. Бірінші томы «Ежелгі дәуір» аталса, «Халықтық және қолданбалы сәндік өнер», «Мүсін монументалды сәндік өнер», «Кескіндеме» және «Графика» болып жалғасады. Аталған жинаққа белгілі тарихшылар, өнертанушылар, әдебиетшілер мен суретшілер, мәдениет және өнер қайраткерлері туындыларының басын қосып, іргелі еңбекті бүгін халыққа ұсынып отырмыз», – деді Астана қаласы Суретшілер одағының басқарма төрағасы, Қазақстанның еңбек сіңірген қайраткері Қоңыр Мұхамедиев. Сондай-ақ, ол бұл жинақтың, әсіресе, жоғары оқу орындарында білім алып жатқан студент қауымы мен ізденушілерге тигізер пайдасы молынан екенін де назардан тыс қалдырмады. Жинақтағы өнертану мақалалары қазақ, орыс, ағылшын тілдерінде оқырманға ұсынылып отырғанын да тілге тиек етті.
Тұсаукесерге арнайы келген белгілі ғалым Ғарифолла Есім бұл көрмеден алған әсерінің ерекше екенін атап айтты. «Мен суретшілер қауымын өте жақсы көремін. Себебі, кезінде он бір жыл көркемсурет факультетінде декан болғанмын. Жалпы, суретшілер бала мінезді, пәк жандар. Бір сөзбен айтқанда, бала мінезді ересек адамдар. Неге бала мінезді болады? Өйткені, бұлар табиғатқа, қоғамға, адамға сол балалық таза көңілмен қарайды да, сол таза көңілдерін өздерінің шығармаларында бояу тілімен сөйлетеді. Бір мысал, Марат Тоқсейітовтің «Алаң», «Кештің түсуі» атты жұмыстары қандай керемет! Ауылдың бейнесін әдемі көрсеткен. Осындай таланттар көбейе бергей», – дейді философ.
Әбдірахман ҚЫДЫРБЕК,
«Егемен Қазақстан».
––––––––––––––––––––––
Суреттерді түсірген
Ерлан ОМАРОВ.
