Табыс негізі ілкімді істер

Медициналық көмекті қайтсе барынша ашық әрі қолжетімді етуге болады? Денсаулық сақтау министрі Салидат Қайырбекованың жетекшілігімен өткен Елбасының «Қазақстан – 2050: бір мүдде, бір мақсат, бір болашақ» атты Жолдауынан туындайтын міндеттердің орындалуы барысын талқылауға арналған жиында осы мәселе жан-жақты пысықталды. Министр өзі басқарып отырған ведомствоның басты міндеті – медициналық көмекті басқарудың және қаржыландырудың тұрақты, нақты, түсінікті және ашық жүйесін қалыптастыру екендігін ерекше атап кетті. Сондықтан алға қойған міндеттер Елбасы Стратегиясында айқындалған мақсаттарға жетуге негіз болуы, сондай-ақ, жүйе халықтың талабына жауап беруі тиіс. Бұл ретте С.Қайырбекова өңірлердегі денсаулық сақтау мекемелері министрлік әзірлеген стандарттар, хаттамалар және алгоритмдер аясында сапалы медициналық қызмет көрсетуге міндетті екендігін қаперге салды. «Мен министрліктің жалақы төлеу және бақылау комитетіне өз жүйелері арқылы мониторингті, оның ішінде сенім телефондары арқылы бақылауды күшейтуді тапсырдым. Барлық негізгі арыз-шағымдар медициналық ұйымдардың рейтингіне әсер етіп, экономикалық зардаптарға әкеліп соқтырады», деді С.Қайырбекова. Министрдің мәліметіне қарағанда, лейкозға шалдыққан балалардың өмір сүруін 76 пайызға дейін ұлғай­туға мүмкіндік туып отыр. Жілік майын трансплантация­лау технологиясын және кардио­хи­рур­гиялық бейінді айтпағанның өзінде, тағы да басқа салалар иге­рілген. Басқа сөйлегендер де оң же­тіс­тіктер жөнінде әңгіме қозғады. Жалпы, Денсаулық сақтау ми­нис­трлігінде өткен алқалы жиында Мемлекет басшысы алға қойған міндеттерді орындау ерек­ше назарға алынғандығы, дәрі­герге деген сенімді ны­ғай­туға жә­не емдеу сапасына жауап­кер­ші­лік жайы кеңінен сөз болды. Бұл айтылғандардың барлығы сала­дағы табыстарға негіз қалауы тиіс. Асқар ТҰРАПБАЙҰЛЫ, «Егемен Қазақстан».