Қазақстан • 30 Қараша, 2021

Азаттық туын асқақтатқан

139 рет көрсетілді

Тұңғыш Президент – Елбасы Нұрсұлтан Назар­баев іргетасын қалап, байтағын берік бекіткен, байрағын биік көтерген тәуелсіздіктің әр таңы біз үшін аса арайлы! Те­рең тарихты зерделерге биік парасат керек. Ортақ мақ­сат­қа ойлы қадам, жаңаша көз­қа­расқа айрықша серпін, жеміс­ті жетістікке жүйелі жоспар жеткізеді.

Біз бұл Тәуелсіздікті ай­тар тұста мұқабасын мың­жыл­дық­тардың шаңы көмген алтын тамырлы тарихты алға тартаты­нымыз белгілі. Әлбет­те сол шежірелі баянның кейін­гі отыз жылын межелі міндет­тері­мізді айқындап, жарқын же­тіс­тіктерімізді жүйелі зерделеп берген тегеурінді тұлға, Елбасы Нұрсұлтан Назарбаевпен байланыстыратынымыз анық. Ши­рек ғасырдан астам шежірелі жолда кемеңгер көш­бас­шы көшелі мемлекет құра білді. Ел­ді басқаруда то­ла­ғай табысқа жетуде тек мақсатты қа­дамдар жасады.

Тәуелсіздік – кешегіні ұлық­тау мен келешекті ұмытпаудан тұ­рады. Бүгінгі Қазақстан­ның есімі – егемен, бесігі – бейбіт тәуелсіз мемлекет дер едік.

Біз – сонау Ұлы даланың  Тұ­ран­дай асқақ қасиетті төрінде ту көтерген көш­пелі көк түрік ба­баларымыздың текті ұр­па­ғы­­мыз.

Ата-бабамыздан аманатқа қал­ған асыл құндылығымыз азаттық­т­ы бүгінде күймелі керуенге те­ңесек, байсалды көш­тің санат­кер көшбасшысы – ол Елбасы Нұрсұлтан Назарбаев!

Бұл күнде Қазақстан жер-жаһанға жақсы атымен танылып, жасампаз істерімен жұртқа үлгі болып отыр. Алты құрлық Алаш төріне жиналып жалпы­адамзаттық тақырыптарды жаппай талқылайтын дәрежеге жеттік. Елба­сының сарабдал саясатының арқасында сая­си қадамдарымыз сатылап өсіп, эконо­микалық екпініміз ерекше артты. Ру­хани бай мұраларымыз зерделі ұрпақ­тың зейінін ашып, жадымызда көне тарихтың көмбесі жаңғырды.

Мұның барлығына Ел­ба­сыдай тең­дессіз тұлғаның тегеу­рінді істері темір­қазық болып келге­нін әр кез айтып отыруымыз керек. Ұлтты ұйыстыруда, жұрт­­ты жұ­мыл­дыруда Тұңғыш Пре­зи­­дент­­тің еселі еңбегі әрқа­шан ел есінде. Бағдарлы бола­шақ­қа бет алған мем­ле­кеттің бәсі биік, басы азат болуға тиіс. Алаш­тың асқақ ақыны Сұлтан­мах­­мұт Торайғырұлының:

«Алаш туы астында, Күн сөнгенше сөнбейміз!» деген айбынды сөзі әр қазақтың айбарын асыратын рухты сөз. Алаш мұраты – азаттықтың тұғырын биік, шығырын берік ету. Біз сол жолда бір жағадан бас, бір жеңнен қол шығара білуіміз маңызды. Бүгінде Елбасы құрған мемлекеттік институттар тұрақты дамып келе жатқанын жақсы білеміз. Елбасы бағыты – ертеңгі Қазақстанның бағдары. Ілкімді істермен ілгері қадам жасау – ел халқын ізгілік пен ірілікке тәрбиелейді.

Ел егемендігінің елеулі жылдарында Елбасы Нұрсұлтан Назар­баевтың бастамасымен жүзеге асқан жоспарлы қадам­дарымыз ұшан-теңіз. Кемел көшбасшының көреген саясаты өзі қабылдаған түрлі бағдарламада анық көрінді. Ана тіліміздің аясы кеңіп, ата тарихымыздың арнасы ұлғайды. Бір сөзбен айтқанда, байырғы тарих бүгіннен болашаққа бет түзеді. Елбасы белгілеп берген межелі міндеттерді мінсіз атқаруымыз маңызды.

Елбасының дара болмысы дана шешім шығаруда қателескен жоқ. Елбасы жолы – егемен еліміз­дің екінші тынысын ашқан алтын даңғыл.

 

Соңғы жаңалықтар

Доллар бағамы көтерілді

Экономика • Кеше

Ұқсас жаңалықтар