Әлем • 03 Желтоқсан, 2021

ЭКСПО-2020: Қазақстанның ұлттық күні аталып өтті

79 рет көрсетілді

Қазақстан Республикасының Премьер-Министрі Асқар Мамин Біріккен Араб Әмірліктеріне ресми сапармен барып, EXPO 2020 Dubai дүниежүзілік көрмесінде Қазақстанның ұлттық күні аясындағы іс-шараларға қатысты.

Халықаралық көрмеде елі­міз­дің ұлттық күні Қазақстан Рес­пуб­ликасының Туын көтеру рәсімімен басталды. ЭКСПО-ның Al Wasl Plaza орталық алаңында өткен салтанатты іс-шараға Премьер-Министр Асқар Мамин мен БАӘ Толеранттық және қатар өмір сүру мәселелері жөніндегі министрі, ЭКСПО 2020 Dubai көрмесінің бас комиссары шейх Нахайан бин Мубарак әл Нахайан қатысты.

Үкімет басшысы сондай-ақ қа­зақ­стандық сауда-инвестициялық форумға қатысты. Онда Қазақстан мен БАӘ-нің мемлекеттік орган­дарының, іскерлік орталарының, ұлт­тық холдингтері мен даму инс­ти­туттарының 100-ге жуық өкілі бас қосты.

– Бүгінгі таңда Қазақстан мен Біріккен Араб Әмірліктері ара­сын­дағы қарым-қатынас сапалы жаңа деңгейге көтерілді. 1991 жылдан бастап БАӘ Қазақстан экономикасына 4 млрд доллардан астам инвестиция салды. Қазақстанда БАӘ капиталы бар 250-ден астам компания жұмыс істейді. Жаһандық экономикада сақталып отырған сын-тегеуріндерге қарамастан, елдеріміздің ынтымақтастығы нығая түсуде, – деді А.Мамин форумның пленарлық сессиясында сөйлеген сөзін-
де.

Үкімет басшысы екіжақты қа­рым-қатынас үшін маңызды оқи­ға­лардың бірі – биылғы қазан айын­да экономиканың басым сала­ларында жобаларды дамыту бо­йынша ұзақмерзімді стратегиялық серіктестік орнату ту­ралы үкі­мет­аралық келісімге қол қою болғанын атап өтті. Құжат Қа­зақстан ұлттық экономика­сының энергетикалық, агроөнер­кә­сіптік, көлік-логис­тикалық, фарма­цев­тикалық және қар­жы сектор­ларындағы жобалар­ды іске асыруға бағытталған, инвес­тициялардың жалпы көлемі 6 млрд доллардан асады.

Форумның пленарлық сессиясында Энергетика министрі Мағзұм Мыр­зағалиев, «Самұрық-Қазына» АҚ Бас­қарма төрағасы Алмасадам Сәтқалиев, БАӘ Энергетика және инфрақұрылым ми­нистрі Сухейл әл-Мазруи, БАӘ Мем­ле­кеттік министрі Ахмед Али әл-Сайех және өзге де тұлғалар сөз сөйледі.

Біріккен Араб Әмірліктері Энергетика және инфрақұрылым министрі Сухейл әл-Мазруи екі ел арасындағы экономикалық қарым-қатынасты жоғары бағалады. Ол жаңа инвестициялар энергетикалық және инфрақұрылымдық сек­тор­ларға бағытталғанын және екі ел арасындағы бірлескен жұмыстың жаңа кезеңінің басталғанын атап өтті. Министр сондай-ақ БАӘ-нің әлемнің 30-ға жуық елінде жүргізген жобаларының нәтижесінде жаңар­тылатын энергия секторында үлкен тәжірибесі барын баса айтты. БАӘ мен Қазақстан арасындағы мұнайдан бөлек сауданың жалпы көлемі 2016 жылдан 2020 жылға дейін 246 млн доллардан 470 млн долларға ұлғайғанын айтқан Сухейл әл-Мазруи бұл екі ел арасындағы әріптестік пен достықтың өсіп келе жатқанын көрсетеді деді.

Қазақстанның Энергетика министрі Мағзұм Мырзағалиев БАӘ-мен энер­гетикалық сектордағы жаңа келісімдер Қазақстанда тұтынылатын энергияның жалпы көлеміндегі жаңартылатын энергия көздерінің үлесін 2030 жылға қарай 3%-дан 15%-ға дейін арттыру мен Қазақстанның көмірге тәуелділігін 70%-дан 40%-ға дейін төмендету бойынша алға қойылған мақсаттарға қол жеткізуге ықпал ететінін мәлімдеді.

Ал БАӘ-нің мемлекеттік ми­нис­трі Ахмед Али әл-Сайех соңғы онжыл­дықта елдер арасындағы екі­жақты қарым-қатынаста оң өзге­рістер болғанын айтып, келесі ке­зеңде экономикалық және инвести­циялық ынтымақтастықты одан әрі кеңейтудің мүмкіндіктері бар екенін атап өтті.

Форум қорытындысы бойынша «Самұрық-Қазына» АҚ мен Abu Dhabi Developmental Holding Company (ADQ) тәуелсіз қоры арасында стратегиялық ынтымақтастық туралы келісімге, сондай-ақ Қазақ­станда жалпы қуаттылығы 4 ГВт болатын күн және жел электр стансаларын салу бойынша инвестициялық құжаттарға қол қойылды.

Қазіргі уақытта әмірліктер компания­лары Қазақстанда жалпы құны 3,5 млрд доллардан асатын 11 ірі инвестициялық жобаны іске асыруға қатысып жатыр. Премьер-Министр А.Мамин Дубай қаласына сапары аясында «QazTrade сауда саясатын дамыту орталығы» АҚ цифрлы көрмесімен танысып, ЭКСПО 2020 Dubai көрмесінің тақырыптық павильондарын аралады, сондай-ақ ол БАӘ жетекші компанияларының басшылығымен келіссөздер жүргізді.

Қазақстанның ұлттық күні ЭКСПО аумағында дүниежүзілік көрме қонақ­тарына арналған мерекелік концертпен аяқталды. Н.Тілен­диев атындағы «Отырар сазы» ака­де­миялық фольклорлық-этно­гра­фиялық оркестрі, опера әншісі Мария Мудряк, «Астана балет» ұжымы мен Қазақстанның басқа да әртістері көрер­менге қазақ даласының сазды әуенін, мәдениетін, ұлттық музыкасын таныс­тырды.

 

Дубай,

Біріккен Араб Әмірліктерінен

Соңғы жаңалықтар

«Аяулы жас келін» атанды

Қоғам • Бүгін, 09:00

Фермерлер дүкені ашылды

Қоғам • Бүгін, 08:58

Көш басында өзгеріс жоқ

Спорт • Бүгін, 08:55

Ширек финалға шықты

Теннис • Бүгін, 08:54

Жалпы есепте топ жарды

Спорт • Бүгін, 08:53

Уәдең қайда, шенеунік?

Қоғам • Бүгін, 08:52

Ұқсас жаңалықтар