Елорда • 03 Желтоқсан, 2021

Елорданың тұрғын үй алаптары газға қосылды

272 рет
көрсетілді
6 мин
оқу үшін

«ҚазТрансГаз» ұлттық компаниясы Нұр-Сұлтан қаласындағы Интернацио­нальный, Мичурино және Күйгенжар тұрғын үй алаптарын табиғи газға қосты. Айтулы оқиға Тұңғыш Президент күні қарсаңында орын алып, ел Тәуелсіздігінің 30 жылдығымен тұспа-тұс келді.

Елорданың тұрғын үй алаптары газға қосылды

Газ құбырларының жалпы ұзынды­ғы 101 шақырымды құрап отыр. Олардың жұмысын жаңадан салынған тиісті газ инфрақұрылымы қамтамасыз етеді. Бар­лы­ғы 1 164 абонентті газдандыру жоспарлану­да. Оның ішінде Интернациональный тұр­ғын үй алабында – 1 182, Мичуринода – 226, Күйгенжар тұрғын үй алабында 236 абонент газға қосылмақ.

Интернациональный тұрғын үй алабы­ның алғашқы тұтынушыларына газды қосу­дың салтанатты рәсіміне Нұр-Сұлтан қа­ласының әкімі Алтай Көлгінов және «ҚазТрансГаз Аймақ» АҚ астана өндірістік филиалының директоры Дәулет Арықбаев қатысты.

Д.Арықбаевтың айтуынша, ел астана­сы­ның алғашқы абоненттері газға өткен жыл­дың ортасында қосылған. Жақында олар­дың саны мыңнан асты.

– Бүгіннен бастап біз Интернациональ­ный, Мичурино және Күйгенжар тұрғын үй алаптарына көгілдір отын бере бастаймыз. Ең алдымен газ күнделікті тұрмыста қолдануға қолайлы отын. Екіншіден, экологиялық таза өнім саналады. Ең бас­тысы, тұрғындар қауіпсіздік ережелерін қатаң сақтаса екен, – деді «ҚазТрансГаз Аймақ» АҚ астана филиалының директоры.

Қазір Нұр-Сұлтанда болашақ абоненттерден тұрғын үйлерді газдандыру үшін тех­никалық шарттар беруге өтініштер қабыл­дау белсенді жүргізіліп жатыр. Бүгінде қала бойынша 4 600-ден астам техникалық шарт беріліп, 15 мыңнан астам адам кеңес алды.

Бұған дейін Нұр-Сұлтан қаласының әкімдігі мен «ҚазТрансГаз Аймақ» АҚ арасында жаңа салынған газ тарату желілеріне сенім­герлік басқару шарты жасалды. Бүгін­гі таңда газды іске қосудың төрт кешені пай­далануға берілді. Қалаішілік газ тарату желі­лерін жергілікті атқарушы органдар мем­лекеттік бюджет есебінен салуда. Қазір­гі уақытта жоспарланған 486,5 шақырым газ құбырының 78 шақырымы салынды.

Нұр-Сұлтан қаласында 22 мың жеке тұрғын үйді, 192 жеке қазандықты, 48 шағын коммуналдық қазандықты, 2-ші ЖЭО-ны газға көшіру жоспарлануда. Бұдан бөлек тұтынушылардың орталық жылу жүйесіне қосылмаған коммуналдық-тұрмыстық және өнеркәсіптік нысандары газдандырылады.

Осылайша, ел астанасының Алматы және Сарыарқа аудандары толықтай газбен қамтамасыз етілді.

– Газға көшудің артықшылықтары көп. Газ қолданыста ыңғайлы, экологиялық тұрғыдан таза әрі қауіпсіз. Бүгін газға көш­кен бірқатар елді мекеннің тұрғын­дары­мен кездестік. Орташа есеппен алғанда олар осы күнге дейін қыс мезгілінде 20-60 тонна көмір жағып келген. Үйлер газға қанша­лық­ты көп қосылса, қала атмосферасына зиянды заттардың таралуы соғұрлым азаяды, – деді Алтай Көлгінов.

Әкімнің айтуынша, қазір қалада 1,5 мыңнан астам отбасы газды пайдалануға көшкен. Осы­ның есебінен кемінде 20 мың тонна көмір жағылмай отыр. Сондай-ақ барлық су жылыту қазандығы газға ауыс­тырылды. Бұл шаралар қала экологиясына жағымды әсер етеді. Бұған дейін Көктал-1, Көктал-2, Темір­жол­шылар, Промышленный, Агроқала­шық, Оңтүстік-шығыс елді мекен­дерінің тұрғындары газға көшу мүм­кін­дігіне ие болды. Бұл ретте 650 шақы­ры­м­нан астам газ тарату желісі салынды.

– Газдандыру – Елбасының тарихи жобасы. Ол үш кезеңнен тұрады. Жобаны жүзеге асыра бастаған сәттен бастап әлеуметтік аз қамтылған отбасыларға газға көшуге көмектесу үшін қолдау көрсетіліп келеді. Басты критерий – басқа тұрғын үйдің болмауы және төрт ең төменгі күнкөріс деңгейінен аспайтын жан басына шаққандағы орташа табыстың болуы. Бұл дегеніміз – 153 872 теңге. Бұл санаттарға 90 АЕК мөлшерінде ақшалай көмек бөлеміз. Бұл 260 мың теңгеден астам қаражатты құрайды. Әлеуметтік көмектің осы түрін алуға өтінімді egov.kz электрондық үкімет порталы арқылы қалдыруға болады. Газдандыру процесі Мемлекет басшысының тікелей бақылауында, – деп жазды астана әкімі өзінің Instagram желі­сіндегі ресми парақшасына.

«ҚазТрансГаз Аймақ» АҚ өндірістік-техникалық департаментінің директоры Уәлихан Қымбатовтың айтуынша, егер газдың келуі ақырындаса немесе басқа да жағдайлар орын алса, тұрғындар 104 бірыңғай нөміріне хабарласуы керек. Болмаса iKomek қосымшасында өті­ніш қалдырған жөн. Мұндай жағдайда ком­панияның екі мобильді бригадасы тұр­ғын­дарға жедел көмек көрсетіп, орын алған проблеманы дереу шешеді.

Көгілдір отынға қолы жеткен тұрғын­дардың қуанышында шек жоқ. Қаланың байырғы тұрғыны Әділбек Төлекенов газға қосылу тұрғындардың өмірін жеңілдете түскенін жеткізді.

– Тұрғындар ауыр жұмыстан арылып, экологиялық таза отынға көшті. Біз бұл күнді асыға күттік. Елдің тұрақты дамуы­ның нәтижесінде Интернациональный тұр­­ғын үй алабында да өркениеттің оң белгі­л­ері біліне бастады. Осы күнге дейін үйді кө­мір­мен жылытып келдік. Жылына 22 тон­на көмір жағамыз. Осылайша, бір мау­­сым­ға 400 мың теңгеден астам қаржы жұм­­сай­мыз. Бұған адамдарға айтарлықтай ауырт­­­па­лық әкелетін дене жүктемесін әрі эко­ло­гияға тиген зиянды қосыңыз. Ал газға қо­сылу өмірімізді жақсарта түспек. Бұл – үлкен игілік. Сондықтан игілікті іске ұйыт­қы болған ел басшылығына, қала әкімі­не және тиісті жұмыстарды тиянақты атқар­ған «ҚазТрансГаз» компаниясына алғысы­мызды білдіреміз, – деді Әділбек Төлекенов.