228 елді мекенге ауыз су келеді

Ауыл тұрғындарының өмір сүру сапасын арттыруды көздейтін маңызды міндетті межелі мерзімге дейін орындап шығу бүгінде Қостанай облысының әлеуметтік-экономикалық дамуындағы ең басым бағыттың бірі болып отыр. Облыста іске асырылып жатқан мемлекеттік бағ­дар­ламалардың нәтижесінде ауыл хал­қын ауыз сумен қамтамасыз ету мәсе­ле­сі де жылдан жылға өз шешімін тауып, кеңестік кезеңнен бері құдықтан су ішіп келген көптеген елді мекенде тұр­ғын­дар құбырдан келетін сапалы суға қол жет­кізді. Бүгінде өңірде 520 ауыл бар десек, соның ішіндегі 292 елді мекенге су келіп тұр. Мұны адам басына шақсақ, ауылдық елді мекендерде өмір сүріп жатқан 348 мың тұрғынның 252,7-сі, яғни 76,6%-ы ауызсумен қамтылған.

Облыстық энергетика және ТКШ бас­қар­масының басшысы Дәурен Асқа­ров­тың айтуынша, 2020 жылы ауылдық елді мекендердің сумен қамтылу деңгейі 7,9 пайызға ұлғайған. Мәселен, 104 ауылға сырттан әкелінетін су тарату пункті орнатылып, нәтижесінде сапалы ауыз сумен қамтылмай отырған ауылдар 20,1 па­йызға қысқарған. Сумен қамтылмаған 228 ауылдың 207-сі құдықтан су ішіп отырса, 21 елді мекенге ауыз су сырттан әкелінеді.

Биыл өңірде «Нұрлы жер» және «Ауыл – ел бесігі» мемлекеттік бағдарламалары ая­сында мемлекет қазынасынан бөлінген 9,7 млрд теңге көлеміндегі қаржыға тұр­ғын­дарды сапалы ауызсумен қамту бо­йынша 32 жоба іске асырылып жатыр. Дәурен Асқаровтың сөзінше, бүгінге де­йін бұл қомақты қаржының 75,5%-ы иге­рілген.

– Жыл соңына дейін 18 жобаны жүзеге асыру жоспарланған еді, бүгінде соның алта­уы іске қосылып, халық игілігіне асып жатыр. Жангелдин ауданындағы Қа­ра­су және Ақкөл ауылдарына, Жітіқара ауда­нына қарасты Приречный елді меке­ні­не, Қарасу ауданындағы Октябрь, Желез­нодорожный, Федоров ауданының Банновка, Чеховка ауылдарына су құбыры тартылды. 14 жоба алдағы жылы аяқталады. 2021 жылдың қорытындысы бойынша барлығы 10 мыңға жуық адам тұратын 19 ауыл орталықтандырылған су құбырымен қамтамасыз етіледі, – деді басқарма басшысы.

Биыл Денисов ауданындағы Крас­но­армейск, Қостанай ауданындағы Алтын­сарин, Науырзым өңіріндегі Раздоль­ный, Ұзынкөл ауданына қарасты Ершов, Арқалықтың маңайындағы Үштөбе, Федоров ауданындағы Баннов­ка мен Чеховка секілді 8 ауыл орталық­тан­ды­рыл­ған су құбырына қосылады. Ал Фе­до­ров ауданындағы Цабелевка, Қара­қо­па, Александрополь, Таза Шаңдақ, Қамысты Шаңдақ, Кравцово, Торғай өңі­ріндегі Сарысу мен Қалам-Қарасу, Қос­танайдың іргесіндегі Шеминов елді ме­кен­деріне су тазарту және тарату то­рап­­тары орнатылады.

Мұның сыртында, биыл 25 мыңға жуық халқы бар 16 ауылда тозығы жеткен су құ­бырлары жөндеуден өтті.

Дәурен Асқаровтың сөзіне қарағанда, 2022 жылдың 1 қаңтарына дейін ауыл тұрғындарын ауыз сумен қамту деңгейі 75 пайызға дейін ұлғаяды. Индус­т­рия және инфрақұрылымдық даму ми­­нистр­лігі 2022 жылы Қостанай об­лы­­сын­да құны 9,2 млрд теңге бола­тын 21 жобаны жүзеге асыруға қол­дау көрсетеді. Мысалы, 1,2 млрд теңге көлеміндегі қаржыға Денисов ауда­ны­ның Приреченка және Окраинка елді мекендеріне су тарату тораптары мен сумен қамту құрылғылары орнатылады. Нәтижесінде, 2023 жылға қарай екі ауылда тұратын 1 мың 128 адам орта­лық­тандырылған суға қол жеткізеді. Со­ны­мен қатар Денисов ауданындағы Свердлов, Қамысты ауданындағы Бес­тө­бе, Адаевка, Қарабалықтағы Стан­цион­ный, Қостанай ауданындағы Айсары мен Половиновка, Меңдіқара ауданына қарасты Архиповка мен Михаиловка, Сарыкөл өңіріндегі Қараоба мен Крылов, Федоров ауданындағы Ленино секілді 9 ауыл сапалы ауыз сумен қамтамасыз еті­ле­ді, – деді облыстық энергетика және тұр­ғын үй-коммуналдық шаруашылығы бас­қармасының басшысы.

Облыста Мемлекет басшысының ауыл­дарды алдағы төрт жыл ішінде сапалы ауыз сумен қамту туралы тапсырмасына сәйкес арнайы жоспар әзірленген. Бұл құжат бойынша, 50 адамнан аз тұрғыны бар 32 ауылды жою жұмыстары жүргізілмек. Сондай-ақ 2022-2024 жылдар аралығында барлығы 20 мыңнан астам тұрғыны бар 29 елді мекенге су құбыры тартылады. Бұл мақсатқа 19 млрд теңге қаржы жұмсалмақ.

Қазір аймақ басшысы облыстық басқармалар мен жергілікті әкімдіктерге 2022 жылдың сәуір айына дейін тағы 15 жобаны әзірлеуді тапсырып отыр. Бұл жобалар бойынша мыңнан астам тұрғыны бар 3 ауылға орталықтандырылған су құбыры тартылып, 12 елді мекенге су тарату тораптары орнатылмақ.

Сонымен қатар 2022 жылдан 2025 жылға дейін ел көшіп кетіп жатқан 116 ауылға сырттан тасымалданатын су тара­ту тораптары орнатылады. Д.Ас­қа­ров­тың айтуынша, халқы аз ауыл­дарды сырттан әкелінетін сумен қам­ту – уа­қытша шара. Бұл елді мекендерде тұр­ғындар саны көбейіп жатқан жағ­дай­да, орталықтандырылған су құбыры тартылатын болады.

Естеріңізде болса, таяуда Индус­тр­ия және инфрақұрылымдық даму ми­нистрінің бірінші орынбасары Қайырбек Өскенбаев ауыл халқын ауыз­сумен қамтудың ең төмен деңгейі бай­қалған өңірлерді атаған еді. Оның ішінде Қостанай облысы да бар. Алайда соңғы жылдары бұл бағытта өңірде ауқымды іс атқарылып жатқанын айтпай кетуге болмайды. Ал бұған мүдделі басқарма өкілдерінің айтуынша, ауыл тұрғындарының ауыз су мәселесін ше­шу мақсатында әзірленген арнайы жос­­пар Мемлекет басшысы тапсырған мі­н­дет­тер­дің 2025 жылға дейін 100% орындалуын толық қамтамасыз етеді.

Қостанай облысы