![Шавкат Мирзиеёв: Өзбек - қазақ қатынасының нығаюына Нұрсұлтан Назарбаевтың сіңірген еңбегі зор](/media/2021/12/04/nur.jpg)
Өзбекстан Республикасын дамыту мақсатында арнайы демократиялық реформалар жүзеге асырылуда. Мақсатты стратегиялар әзірленіп, жаңа Өзбекстанды нығайту аясында нақты жоспар құрылған. Мұндай қарқынды қадамдарды жүзеге асыруға көрші ел көшбасшысы Президенттікке қадам басқан алғашқы күннен кіріскенін жеткізді.
«Біз ұлттық экономиканың өсу қарқынын арттыру, жеке секторды ынталандыру және оның үлесін арттыру арқылы экономиканың құрылымында жан басына шаққандағы ішкі жалпы өнімнің тұрақты өсуін қамтамасыз етеміз, сондай-ақ тікелей шетелдік инвестицияларды тарту арқылы 2030 жылға қарай Өзбекстан жан басына шаққандағы табысы орташа деңгейден жоғары бірқатар мемлекеттің қатарына кіре алады. Бұл ретте елімізде тыныштық пен қауіпсіздікті қамтамасыз ету, заңның үстемдігі, әділ әлеуметтік саясатты жүзеге асыру, сондай-ақ рухани-білім саласындағы реформаларды күшейтудегі жұмысымыздың басты өлшемі «Жаңа Өзбекстан – ағартушы қоғам» концепциясы болып қала бермек.
«Іс-қимыл стратегиясынан – Даму стратегиясына» идеясын іске асыру шеңберінде біз Орталық Азия аймағында өзара түсіністік пен құрмет, тату көршілік пен стратегиялық әріптестік атмосферасын нығайту бағытын жалғастыру ниетіндеміз. Бұл мақсаттарға қол жеткізу ең жақын көршілеріміз – Орталық Азия мемлекеттерімен өзара іс-қимылсыз мүмкін емес екені сөзсіз», деді Шавкат Мирзиёев.
Сондай-ақ, ол өзбек-қазақ қатынасының берік бекуінде Елбасы Нұрсұлтан Назарбаевтың рөлін ерекше атап өтті.
«Қазақстан бұл қатарда өте маңызды орын алады, байыпты саяси, қаржылық, экономикалық, демографиялық әлеуетке ие, сонымен қатар Орталық Азия мемлекеттері мен халықтарын жақындастыруға мүдделі.
Осы тарихи үдерістерде заманымыздың ірі мемлекет және саяси қайраткері, Қазақстанның Тұңғыш Президенті – Елбасы Нұрсұлтан Әбішұлы Назарбаевтың сіңірген еңбегі зор екенін ерекше атап өткім келеді», деді ол.
Өзбекстан Президентінің пікірі мен ұстанымдары, өзге де ойымен «Өзбекстан Президенті Шавкат МИРЗИЁЕВ: Жарқын болашақты бірге құрамыз» сұхбатында толық таныса аласыз.