Елбасы «Болашақ» түлектері Отанының қамқорлығын сезініп, елге қызмет етіп, үміт ақтайтынына сенім білдірді. «Болашақ» халықаралық стипендиясы ел Тәуелсіздігі арқасында жастарға жасалған зор қолдауы, үлкен мүмкіндігі деп білемін. Егемендік алған елең-алаң тұста, халық ішерге тамақ, киерге киім таппай қиналып жүрген уақытта қаражат бөліп, жастарды шетелге білім алуға жіберуі – ұзақ мерзімге жасалған инвестиция екені анық. Өйткені қазіргідей дәуірде білім мен ғылымсыз мемлекет дамудың даңғыл жолына түсе алмайды. Осылайша, «Болашақ» бағдарламасы арқылы әлемнің маңдайалды жоғары оқу орындарында білім алған жастар кейінірек Қазақстанның халықаралық аренада мойындалуына мол үлес қосты. Бұл – біріншіден.
Екіншіден, бағдарлама бірегей әлеуметтік лифтке айналды. «Болашақ» қарапайым отбасынан үздіктердің ілімін шыңдауға мол мүмкіндік берді. Осынау ширек ғасырда көптеген жас маман әлемдегі ең рейтингі жоғары оқу орындарында білім алуға қол жеткізді. Әсіресе, шалғай ауылдардан шыққан білімді жастар шартараптың үздік университеттерінде ғылымның қыр-сырын үйреніп қайтты.
Осы орайда, «Болашақпен» білім алғандар арасында бұқаралық ақпарат құралдары өкілдері де бар екені үлкен қуаныш. Елбасы айтқанындай-ақ, шын мәнінде «бұл – нағыз адам капиталы». Солардың қатарында Ұлыбританияда білім алғанымды мақтан тұтамын.
Осы орайда, АҚШ-тың негізін қалағандардың бірі, мемлекет қайраткері Бенжамин Франклиннің сөзі еске түседі. «Білімге салынған инвестицияның қайтарымы (үстемеақысы) әрдайым жоғары болады», дейді америкалық дипломат.
Жалпы, «Болашақтың» ел дамуына әкелген пайдасы ұшан-теңіз. Жастарға салынған инвестицияның қайтарымы молынан болғаны, болашақтықтардың экономиканың негізгі секторларын ілгерілетуге қомақты үлес қосқаны анық. Сондықтан аталған бағдарлама – Тәуелсіз Қазақстан әкелген ұтымды шешімдердің бірі.
Қанат ӘУЕСБАЙ,
«Болашақ» бағдарламасының түлегі, журналист,
ҚР Президентінің халықаралық «Болашақ» стипендиясы стипендиаттары Қауымдастығының Кеңес мүшесі
