– Дүниежүзіндегі экономикалық дағдарыстарға қарамастан, Президенттің, Үкіметтің қолдауларының, мемлекеттік бағдарламалардың іске асуының нәтижесінде өңірде айтарлықтай даму қарқыны бар. Мәселен, Мемлекет басшысының Қазақстан халқына Жолдауында берілген тапсырмаларды тиімді іске асырудың нәтижесінде биыл аймақтың 11 айдағы экономиканың даму қарқыны 104,9%-ды құрады. Өңірдегі негізгі әлеуметтік-экономикалық көрсеткіштер былтырғы көрсеткіштерден және республиканың орта көрсеткішінен де жоғары. Экономиканың дамуы – тартылған инвестицияға байланысты. Есепті кезеңде облыс экономикасына 350 млрд теңгеден астам инвестиция тартылды. Соның нәтижесінде, аймақтағы кәсіпорындар 530 млрд теңгенің өнімін өндірді, – дейді аймақ басшысы.
Аталған өңірде ауыл шаруашылығы саласындағы өсім 101,5%-ды құрады. Мемлекет басшысы тапсырмаларының бірі – жұмыссыздар санын көбейтпеу. Облыста жұмыссыздық деңгейі – 4,9%. Келесі мәселе – бағаның өсуіне жол бермеу. Өткен айларда инфляция 107,7%-ды құрады. Бюджетті игеру көрсеткіші – 98,9%. Жыл соңына дейін берілген қаржы жоспарға сәйкес 99,9% игеріледі.
– Бүгінде маңызды мәселелердің бірі – індетке қарсы күрес. Қабылданған шаралардың нәтижесінде соңғы кездері індет жұқтырғандар саны тәулігіне 10-нан аспайды. Пандемия басталған кезден бастап 21 мыңнан астам адам науқастанып, қажетті төсектік орындар дайындалды. Індетті жеңу жолдарының бірі – вакциналау. Бүгінде аймақ тұрғындарының 98%-ы егілді. Қажетті дәрі-дәрмек, құрал-жабдықтар толық қамтамасыз етілді. Карантиндік талаптарды сақтау үшін мобильдік топтар құрылды. Олар ірі сауда орындарында, базарларда, мейрамханаларда жұмыс істеп жатыр, – дейді облыс басшысы.
Жамбыл облысында Мемлекет басшысының Жолдауындағы міндеттерін іске асыру аясында фармацевтика саласы белсенді дамуда. 2021 жылдың 11 айында фармацевтика саласында 3 млрд-тан астам өнім шығарылды. Ең негізгісі індеттерге қарсы құрал-жабдықтар шығаратын «Суперфарм» фабрикасы және ауруларды анықтайтын экспресс тест шығаратын зауыт. Оның құрылысы былтыр басталып, вакцина шығаратын зауыттың бірінші кезеңі іске қосылды. Қыркүйектен бері кәсіпорын айына 500 мың доза вакцина шығара бастады.
– Жалпы, 11 айда 1,5 млн доза қазақстандық вакцина шығарылды. Алғаш рет экспорт Қырғызстанға жөнелтілді. Қазір Орталық Азия және Еуропа елдерінен де сұраныс бар. ДДҰ рұқсаты берілген. Жыл соңына дейін қуаттылық 2 млн дозаға жеткізілмек. Қазіргі кезде зауыттың екінші кезеңінің құрылысы басталды. Оны сәуір-мамыр айларында аяқтау көзделген. Сол кезде айына кемінде 2-3 млн доза, коронавирустан басқа да ауруларға қатысты вакциналар шығарылады. Мақсат – халықты екпелермен қамтамасыз ету және оларды басқа мемлекеттерге экспорттау, – деді әкім.
Әлемдік экономикалық дағдарыстағы маңызды мәселенің бірі – мемлекеттің азық-түлік қауіпсіздігін қамтамасыз ету. Жамбыл облысында осы мақсатта агроөнеркәсіптік кешенді дамытуға ерекше назар аударылады. Биылғы қуаңшылыққа, су тапшылығына қарамастан, егістік алқабы 30 мың гектарға ұлғайды. Пайдаланылмай жатқан 112 мың гектар жер мемлекет меншігіне қайтарылды.
– Суармалы жерлердің аумағын кеңейту мәселесі де күн тәртібінен түспейтіні белгілі. Биыл қосымша 41 мың гектар суармалы жер қалпына келтіріліп, өңірдегі мұндай жерлердің жалпы көлемі 180 мың гектарға жетті. Суармалы жерлерді көбейту үшін су тапшылығын ескере отырып, арнайы су балансын жасадық. Ондағы мақсат – жер асты, жер үсті суларын анықтау, оларды тиімді пайдалану. А.Сафин атындағы ғылыми зерттеу институтының мәліметінше, жер астынан кем дегенде 700-800 млн текше метр суды пайдалануға болады. Ол үшін кем дегенде 700 сутартқыш жаңадан салынуы немесе қалпына келтірілуі тиіс. Сонымен қатар жаңа технологиялар қолданысқа енгізілуде. Мұны шаруалар да жете түсіне бастады. Қазіргі кезде Израиль. Сондай-ақ басқа да мемлекеттермен жұмыс істеп, кәсіпкерлердің, Әлеуметтік кәсіпкерлік корпорациясының есебінен жаңбырлатып суару құрылғылары орнатылуда. Мал шаруашылығында мал басының өсімі 6-8%-ды құрап отыр, – деді аймақ басшысы.
Бұдан бөлек, өңір табиғаты көкөніс, өнім өсіруге қолайлы. Биыл аталған облыста алма көптеп өсірілуде. Мәселен, 11 айда 42 тонна алма араб елдеріне экспортталды. Ал ет экспорты 4,5 мың тоннаны құрады.
– Бұған қоса, облыста балық шаруашылығын жүргізуге арналған 140-тан астам су қоймасы бар. Форель балықтарын өсіруге арналған 18 тау учаскесі анықталды. Бұл іске қызығушылық танытқан 7 шаруа қожалығы бар. Онда форель өсіру ісі ғана қолға алынып қоймай, тұрғындарға арналған демалыс орындары да қарастырылады. Сондай-ақ бал өндірушілерге жергілікті бюджеттен қосымша субсидия беру мәселесі қарастырылуда. Бұған қоса, құлпынай мен таңқурай өсімдіктерін өсіру ісі де дамитын болады. Президенттің тапсырмаларының бірі әлеуметтік маңызы бар тауарлар бағасын тұрақтандыру бойынша бірқатар жұмыстар жүргізілуде. Үкімет жанынан арнайы комиссия құрылды. Бағаны өсірмеу бойынша «Алқаптан сөреге дейін» жобасы іске асырылуда. Яғни шаруа өз өнімін делдалдарсыз тікелей сауда орындарына жеткізеді. Сондай-ақ өңірде 32 әлеуметтік дүкен жұмыс істейді. Соның ішінде 15-і Тараз қаласында. Ондағы бағалар сауда орталықтарымен, базармен салыстырғанда 15-20%-ға төмен. Жақында бағаны қадағалайтын статистика бюросының мамандары да келіп тексерді, – деді Б.Сапарбаев.
Бұдан бөлек, тұрақтандыру қорына бюджеттен қосымша қаржы бөлінді. Қазіргі кезде онда шамамен 3,5 мың тонна әлеуметтік маңызы бар тауарлар бар. Өңірде 19 әлеуметтік азық-түлік тауарларының 9-ы толық, 8-і – 50%-ға қамтылып, 2-еуі – күріш пен қарақұмық Қызылорда және Шығыс Қазақстан облыстарынан жеткізілуде.
– Ел Президентінің басты тапсырмаларының бірі – шағын және орта бизнесті дамыту, қосымша жұмыс орындарын ашу. Бүгінгі таңда өңір бойынша бұл көрсеткіш 23%-ды құрайды. Шағын және орта бизнес субъектілерін қолдау үшін 11 айда шамамен 18 млрд теңге бөлінді. Бірақ бұл жұмыс одан әрі жалғасатын болады. Бизнесмендерге біздің мемлекеттік бағдарламаларымыз, әсіресе «Қарапайым заттар экономикасы» үлкен көмек көрсетеді. Бұл тұрғыда өңір республика бойынша көш бастап тұр. Шамамен 95 млрд теңгеге өнім өндіріліп, кәсіпкерлеріміз 70 млрд теңгеге жуық қаражат алды, – дейді облыс әкімі.
Тұрғындарды баспанамен қамту мәселесі де маңыздылығын жойған жоқ. Осы мақсатта, облыста биыл 600 мың шаршы метр тұрғын үй берілді. Міндет – 650 мыңға дейін жеткізу. Жыл соңына дейін қосымша 50 мың шаршы метр пайдалануға беріледі. Ел Президентінің тапсырмасына сәйкес, Бірыңғай зейнетақы төлемдері халық үшін үлкен қолдау болды. Облыстағы салымшылардың шоттарына зейнетақы қорынан 10 мыңға жуық салымшыдан 25 млрд теңге аударылды. 4 858 тұрғын 15 млрд теңгеге пәтер алды.
– Өңірде жұмыспен қамту және жұмыссыздықпен күрес мәселесі белсенді шешілуде. Мемлекеттік бағдарламалардың нәтижесінде 54 мың адам қамтылып, 30 мың жұмыс орны, соның ішінде 17 мың тұрақты жұмыс орны құрылды. Өңірде АӘК алушылар саны көп. Өткен 11 айда мұндай атаулы әлеуметтік көмектің шарапатын 11 мың отбасы көрді. Ал өңірдегі орташа жалақы 22,6%-ға өсті. Мемлекет басшысы мектептер құрылысын арттырып, апатты жағдайдағы және үш ауысымдық мектептер санын азайту жөніндегі тапсырма берген болатын. Осы мақсатта биыл 18 мектеп пайдалануға беріледі. Соның ішінде 12-сі – жекеменшік білім ордасы. 23 мектепте күрделі жөндеу жұмыстары жүргізілуде. Мектепке дейінгі білім мекемелерімен 3-6 жас аралығында балалар 100% қамтылған. «Дабыл түймесі» және мектептерді полиция департаменттерімен байланыстыру бойынша жұмыстар жалғасуда. Колледждерде «Жас маман» бағдарламасы қолға алынды. Сонымен қатар өңірде С.Ж.Асфендияров атындағы Қазақ ұлттық медициналық университетінің филиалы ашылды. Бұл дәрігерлер тапшылығын жоюға септігін тигізеді. Жергілікті бюджеттен медициналық мекемелердің материалдық базасын нығайтуға 3 млрд теңгеден астам қаражат бөлінді, – деді спикер.
Сондай-ақ Мемлекет басшысының тапсырмасына сәйкес Жамбыл облысында мемлекеттік бағдарламалардан бөлек, аймақтық деңгейдегі жобаларды жүзеге асыру да игі үрдіске айналды.
– Соның бірі – «Жомарт түлек» жобасы шеңберінде табысты түлектердің демеушілігімен 2,8 млрд теңгеге 67 елді мекенде жобалар жүзеге асуда. «Асар» жобасы аясында биыл 133 үйдің құрылысы жоспарланып, 75-і пайдалануға берілді. «Таразға тарту» жобасы арқылы Тараз қаласы аумағында 47 нысан салынып, жөнделді. «Бизнестің әлеуметтік жауапкершілігі» шегінде 12,7 млрд теңге бөлінді, – деді облыс басшысы.
