Қасиетті Әулие-Ата топырағынан келген балуандар арасынан аса жеңіл салмақтағы Рахат Қалжанның асқан шеберлігіне тәнті болдық. Барлық бәсекелестерін сыпыра ұтқан ол шешуші тұста алматылық Мерей Базарбаевтан басым түсті. Сол секілді биыл ғана алыптармен айқасуға бел буған Әлішер Ерғалидің де екпініне ешкім шыдай алмады. Биыл Токио Олимпиадасына қатысқан қандасымыз ақтық сында Шығыс Қазақстан облысының өкілі, Азия чемпионы Олег Болтинмен айқасуға тиіс еді. Алайда жарақатын желеу еткен қарсыласы боз кілемге шығудан бас тартты.
Ал өзге салмақ дәрежелерінде талдықорғандық Ақбар Құрбанов (61 кило), нұрсұлтандық Санжар Досжанов (65 кило), атыраулық Сырбаз Талғат (70 кило), солтүстікқазақстандық Нұрқожа Қайпанов (74 кило), маңғыстаулық Жігер Зәкіров (79 кило), өскемендік Азамат Дәулетбеков (86 кило), алматылық Әділет Даулымбаев (92 кило) және павлодарлық Мәмед Ибрагимов (97 кило) сынды саңлақтар ел чемпионы атанды.
