Аймақтар • 13 Желтоқсан, 2021

Сарыбелде Тәуелсіздік тойына арналған салтанатты шара өтті

276 рет көрсетілді

Астана мен Қарағанды арасынан ойып орын алған Осакаров ауданының орталығында Тәуелсіздіктің 30 жылдығына арналған мағыналы іс-шара өтті. Бұл кеште «Елімнің бақытын тербеткен Тәуелсіздік» фильмінің және «Осакаров ауданы: Тәуелсіздік шежіресі» кітабының тұсаукесері ұйымдастырылды, деп жазады Egemen.kz.

Осы орайда ырыс пен құт дарыған Осакаров ауданы туралы қысқа да нұсқа айта кеткен ләзім. Қазіргі таңда ауданды көптеген ұлт пен ұлыстың баласынан құралған 30 мың адам мекен етеді. Тұрғындарының басым көпшілігі ауыл шаруашылығымен айналысады. Ауданның аста-төк астығы мен мол картобы ішкі тұтынуды қанағаттандырып қана қоймай, экспортқа да шығарылады. Мал шаруашылығы да дамыған. Мысалы 1991 жылдан 2000 жылға дейін ауданның 39 мемлекеттік кәсіпорны шаруашылық жүргізудің жаңа түріне көшірілген екен.Е

Жалпы Осакаров ауданындағы өнеркәсіптің негізі «Kazakhmys Coal» ЖШС көмір кенішінің Бөрілі департаменті мен «Қазсушар» РМК-ның Қ.Сәтбаев атындағы су каналы сынды қалатүзуші екі кәсіпорыннан құралады.

Бүгінде ауданда құрылыс жұмыстары қарқынды жүріп жатыр. Мысалы соңғы деректерге сай, ауданда 300 отбасы баспанамен қамтамасыз етілген. Тәуелсіздік жылдары үш мектеп, екі бала бақша және мыңнан астам бала келетін 36 мини-орталық салыныпты.

Міне, ауданның Тәуелсіздік жылдарындағы осы және басқа да салаларда қол жеткізген табыстары «Елімнің бақытын тербеткен Тәуелсіздік» фильмінде кеңінен айтылды. Бұл жоба идеясының авторы аудан әкімі Нұркен Қобжановтың өзі болған екен. Фильм барысында екі жүргізуші дөңгелек үстел басында егемен еліміздің қалыптасуына куә болған аудан тұрғындары  және   Тәуелсіздік  құрдастарымен өткенді еске алған, бүгінгі тыныс-тіршілікті сөз еткен ауқымды сұхбатты қазақ және орыс тілдерінде жүргізеді.

Сұхбатқа қатысқандардың қатарында аудандық ардагерлер кеңесінің төрағасы, құрметті азамат  Ислам Шәкірбеков, ауданның құрметті азаматтары Григорий Бодик, Еркінбай Теміров, мемлекеттік қызметтің ардагері Ольга Геренчир, аудандық мәслихаттың хатшысы Қанат Саққұлақов, спорт ардагері Сергей Потупаленко, денсаулық сақтау ардагері Светлана Шемерлюк, денсаулық сақтау қзметкері Жұмаш Нұрмұханбетова, «Сельский труженник» газетінің тілшісі Елена Врона, Тәуелсіздік құрдасы Әйгерім Сүлейменова және басқалар болды.

Бұдан кейін ел Тәуелсіздігінің 30 жылындағы өңірдің тарихы мен әлеуметтік-экономикалық дамуына арналған «Осакаров ауданы: Тәуелсіздік шежіресі» атты кітаптың тұсаукесері болды. Басылымды таныстыру құрметіне мемлекеттік қызметтің ардагері Ольга Владимировна Геренчир ие болды.

Тұсаукесер рәсімінде аудан әкімі бұл кітаптың өлке тарихына құрметпен қарайтын жергілікті тұрғындар үшін үлкен тарту болатынын атап өтті.

– Осакаров ауданы – әр түрлі тағдыр, мінез, ұрпақ өкілдерінің басын  біріктіретін ортақ үйіміз. Бұл кітап ауданның қалыптасуы және оның дамуына үлес қосқан адамдар туралы. Құнды еңбек біздің туған жерімізде болып жатқан оқиғалар, экономика, мәдениет, білім, медицина және басқа да салалардың дамуы туралы әңгімелейді, – деді ол.

Сахна төріне көтеріліп, жергілікті тұрғындарды ұлық мерекемен құттықтаған аудан әкім Нұркен Қобжанов деректі фильмнің түсіріліміне және тарих, экономика, мәдениет, білім, медицина және басқа да салаларға қатысты материалдар қамтылған жаңа туындының жарық көруіне белсене ат салысқан азаматтарға алғыс айтты. Олардың бәрі төрге шақырылып, лайықты сый-сияпат көрді.

Мерекелік шара барысында ауданның өнерпаздары би билеп, әннен шашу шашты. Атап айтқанда, ауданда тұратын талантты жастар Осакаров ауданының болашақтағы гимні іспетті «Сарыбел» атты екі бірдей ән шығарған екен, солар сахна төрінен орындалғанда жұрт орындарынан көтеріліп кетті.

«Сарыбел» демекші, аудан халқы алдағы уақытта «Оскаров» атауының дәл осындай болып өзгеретініне бек сенімді екен. Иә, құт қонып, қыдыр дарыған өлкеге өзінің тарихи атауы тезірек орласа екен деген игі тілекке біз де шын ықыласпен ниеттестік білдірдік.

Соңғы жаңалықтар

Ұлы даланың ұлағаты

Аймақтар • Бүгін, 12:23

Ұстаздың аты өлмейді

Білім • Бүгін, 10:30

Карапастың қарқыны күшті

Спорт • Бүгін, 10:29

«Каспий» көш бастады

Спорт • Бүгін, 10:27

«Жас дарын» байқауы өтті

Аймақтар • Бүгін, 08:58

Элитадағы орнын сақтап қалды

Хоккей • Бүгін, 08:55

Адалдық пен шындықты шырақ етті

Қазақстан • Бүгін, 08:48

Ұқсас жаңалықтар