Ферроқорытпа зауытының құрылысы басталды

 

Заманауи зауыт 94,5 МВА-лық 4 пештен тұрады. Оның ең жоғары өндірістік қуаты – жылына 240 мың тонна жоғары сапалы ферросилиций өндіру. Толық автоматтандырылған жаңа кәсіпорынды іске қосу 2023 жылға жоспарланған. Кә­сіпорын ферросилицийге деген жаһандық сұранысты қанағат­тандыру үшін салынып жатыр. EkibastuzFerroAlloys компания­сы Еуропа, Оңтүстік-Шығыс Азия, Солтүстік және Оңтүстік Америка нарықтарында өз өнімдерін сатуды жоспарлап отыр. Дайын өнімді өткізуге арналған тиісті келісімдер мен офтейк келісімшарттар жасалды. Алдын ала есептеулерге сәйкес, экспорт құнының көлемі жылына 76 млрд теңгені құрамақ.

– Кәсіпорынның Екібастұз қаласын жаңғыртуда страте­гиялық маңызы бар. Жоба эколо­гиялық тұрғыдан таза болып саналады. Өйткені қалдықтардан микрокремнез өндіріледі. Ол да әлемдік нарықта сұранысқа ие. Жаңа зауыттың өнімі әлемдік стандарт­тың барлық талапта­рына толық сәйкес келеді және 100 пайыз экспортқа бағ­дар­ланған. Біз алдымызға өршіл мақ­саттар қойып отырмыз. Яғни экспорт географиясын әлем­­нің 52 еліне дейін ұлғайту және фер­росилицийдің әлемдік на­рығында көшбасшы позицияға ие болу. Жоба өңірдің экспорттық әлеуетін арттыруға мүмкіндік береді және қаланың білікті тех­­никалық мамандарын ұстап қалуда маңызды рөл атқарады, – дейді EkibastuzFerroAlloys ЖШС акционері Ерлан Нығ­матулин.

Жаңа кәсіпорын «Екібастұз ГРЭС-1» ЖШС-нің жанында орналаспақ. Бұл шикізат пен электр энергиясы көздеріне жақын орналасқандықтан өндіріс қауіпсіздігін қамтамасыз етеді.

– Осыдан бір ай бұрын Павлодар облысында Президент Қасым-Жомарт Тоқаев жұмыс сапарымен болып, моноқалаларды дамыту жөнінде кеңес өткізді. Еске сала кетейін, биыл Мемлекет басшысы біздің моноқаламыз – Екібастұзды дамытудың Кешенді жоспарын әзірлеуді тапсырған болатын. Бұл жоспардағы ірі инвестициялық жобаларының бірі – EkibastuzFerroAlloys компаниясы жүргізетін ферроқорытпа өндіру зауытының құрылысы. Оны жүзеге асыру Екібастұзды дамыту жоспары бекітілгеннен кейін бірден басталды. Бұл Президенттің ірі инвестициялық жобаларды іске асыру жөніндегі тапсырмасының орындалғанын көрсетеді. Ел Тәуелсіздігінің 30 жылдығы қарсаңында заманауи кәсіпорын құрылысының басталғаны туралы хабарлау екі есе жағымды. Жоба 800 адамды тұрақты жұмыспен қамтамасыз етуге мүмкіндік береді. Жаңа кәсіпорынның жұмысы есебінен ферросилицийдің шикізаттық емес экспорт көлемі 4 есе өседі деп күтілуде. Жоба республикалық Индустрияландыру картасына және Павлодар облысының 2020-2025 жылдарға арналған кәсіпкерлікті қолдау картасына енгізілген. Жаңа кәсіпорынның ашылуы экономиканы әртарап­тандыруға және біздің аймақтың, сонымен қатар тұтас елдің дамуы­на оң әсер ететініне сенімдімін, – дейді Павлодар облысының әкімі Әбілқайыр Сқақов.

EkibastuzFerroAlloys ЖШС акционерлерінің бірі Давид Кемертелидзенің айтуынша, әлемдегі ферросилиций нарығы тұрақты. Өйткені ол ірі тоннажды ферроқорытпалар класына жатады.

– Оның жаһандық қажеттілігі тұ­рақты болып қалады.­ Сон­дықтан біз мұны өте перспек­тивалы бағыт деп санаймыз. Екі­бас­тұздағы кадрлық әлеуеттің жоғарылығы да жобаны табысты іске асырудың кепілі болмақ. Жоба табысты болатынына және белгіленген мерзімде іске асырылатынына сенімдімін. Осындай ірі инвестициялық жобалардың болуы, оған инвесторлардың белсенді қатысуы Қазақстандағы инвестициялық ахуалдың қо­лайлы екенін көрсетеді. Сондай-ақ бұл Үкімет тарапынан инвес­торларды қолдаудың нақ­ты мысалы, – дейді Давид Кемертелидзе.

Оның пікірінше, өнімнің өзіндік құнындағы қазақстандық қамту үлесі 96 пайызды құрайды. Себебі өндіріс үшін негізгі ресурстар Павлодар облысынан алынады.

Кәсіпорын құрылтай­шы­ла­ры­ның айтуынша, зауыттың тех­ни­калық жабдықталуы бар­лық әлемдік сапа стандарттарына сәйкес келмек. Осындай жүйе бойынша ұқсас жобалар (YDD Corporation ЖШС және Qaz Carbon ЖШС) Қарағанды қаласында іске асырылған.

– Екібастұздағы жаңа фер­ро­қорытпа зауытының құры­лысы акционерлер тобымен бірлескен алғашқы жобамыз емес. Бұрын Қарағанды облысында ферроқорытпа зауыттары мен агломерациялық фабрикаларды іске қосу кезінде ынтымақтасқан едік. Екі жоба да өңір үшін, тұтас ел үшін табыс­ты, экономикалық тұрғыдан да, әлеуметтік тұрғыдан да маңызды болды. Сондықтан толысқан тәжірибе мен тиісті құзыреттер қазақстандық металлургияны әлемдік индустрияның жаңа деңгейіне шығара алатын осы жобаны табысты іске асырарына сенімдіміз, – дейді Қазақстан даму банкінің басқарма төрағасы Абай Сарқұлов.

Қазақстан даму банкі жобаның әлеуметтік құрамдас бөлігіне ерекше назар аударатындықтан, А.Сарқұлов Екібастұздағы жаңа зауыттың даму индексі жақ­сы екенін атап өтті. Зауыт эко­номикалық тұрғыдан да, әлеу­мет­тік жағынан да аймақтың дамуына оң әсер етпек.